【又到聖誕】10大最hea最唔想收到嘅聖誕禮物

眨下眼又到左大家最鐘意嘅聖誕節！各位最期待的節日活動係咩呢？平安夜玩通宵？除夕倒數？計我話，除左食大餐、睇燈飾，交換禮物更加係唔少得啦！不過而家啲人啲禮物越買越hea，真係唔想貼錢買啲垃圾番屋企囉好冇！以下呢個10大最hea最唔想收到嘅聖誕禮物list，又有冇正中你心聲呢？又或者正正就係你買嗰份？
1. 相架
其實今時今日都冇咩人係會曬相，收到相架真係唔知好嬲定好笑，唔爭在送埋部老爺菲林機呀？我諗到時就冇人會埋怨喇！收到老爺機仲唔發到豬頭咁！

2. 水杯
水杯長期處於十大最唔想收到的聖誕禮物中的top 3，事關屋企真係太多杯，仲要好多都係抽番嚟，真係唔想再收到百貨公司100蚊一對嗰啲花紋公仔杯！不過如果係咖啡店嗰啲聖誕限定杯又唔錯啵！

3. 無聊擺設
其實送嗰個人係咪嫌人地屋企太多位呢？擺設又冇用又冇位放！講真而家香港居住環境愈嚟愈細，收到無咩實際用際嘅「擺設」做禮物隨時變垃圾。希望各位買禮物前三思！

4. 月曆
一到年尾唔少快餐店、商舖，甚至樓下嘅屋苑辦事處都會派發月曆，或者直程寄埋去你屋企。查實而家啲人多數都係用手機calendar，月曆呢樣野，就算免費都唔想收太多個。
5. 鐘
我明白而家啲後生仔思想唔再咁守舊迷信，覺得送鐘唔係咩大忌，但係一拆禮物發現係個鐘都真係幾無奈。一個正常屋企應該至少都有一個鐘，唔缺乏鐘之餘，亦都冇買多一個鐘嘅需要，送鐘嗰位人兄係咪想提醒大家珍惜時間？

6. 公仔
雖然有啲女仔會希望收到公仔，但如果係啲大大隻又勁甩毛，甚至係啲講唔出名的公仔，都真係唔多想收到。如果係男仔抽到的話就更加...嗯！多謝晒。

7. 護膚品套裝
好多人因為見有優惠而且以為大方得體，每年聖誕都去幫襯啲連鎖店買護膚品套裝做禮物。其實每個人皮膚都唔同，2013年嗰盒都未用過！你送多set比我有何居心呢？冬天再乾燥都唔洗搽咁多枝cream呱？

8. 毛巾
迪士尼手巾浴巾set！公主蕾絲手帕！聽落好吸引，但屋企又唔係冇毛巾用，收咁多條嚟做咩呢？咁新淨用嚟做地布？定冬天凍得制當被蓋？

9. 文具套裝
雖然我平時的嗜好係寫小說、扮文青，夢想係成為大文豪，但筆呀、擦膠呀等文具其實唔需要多，夠用就得。所以大家真係唔洗再買50蚊一set嗰啲文具套裝比我，一方面以為自己買左好多野，另一方面又妄想自己買嘅野好實用，謝謝。
10. 食用/日用品
好多人R爆頭都諗唔到買咩，唯有買百幾蚊食物同日用品做禮物 : 朱古力禮盒、花膠、瑤柱、牙膏set、洗髮水、紙巾，真係咩都有機會收到！真係想問聲 : 係咪買餸順便買埋？

交換聖誕禮物本身係件開心事，但如果連收嗰個都感受唔到快樂，咁你份禮物就真係fail咗啲喇！將心彼己，你唔想收番水杯或者毛巾的話，就唔好hea住揀嚟遺禍人間喇！喺度祝大家聖誕快樂！希望大家都收到合心水的禮物！Merry Christmas!

文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com