​【辦公室健康】6招預防「冷氣病」

話咁快又到八月，天氣越來越熱，出一出街都成身汗，在室內怎可以不開冷氣啊 ? 每次在辦公室開冷氣雖然係冇咁熱，但個人就好像作感冒咁，又頭痛又四肢無力又咳，唔講唔知，原來這些都是「冷氣病」的症狀 ! 「冷氣病」又稱「空調綜合症」或「空調不適應症」，所指的是長期身處在冷氣環境下工作而產生不適應的情況，可能導致四肢無力酸痛、頭暈、咳嗽或口乾鼻痕等類似作感冒的症狀。想歎冷氣的同時又想預防「冷氣病」? 醒你6招輕鬆幫到你 !
一. 冷氣溫度切忌較得太低
低溫環境會容易刺激到鼻腔、氣管等呼吸道，特別是對於體質不好、屬於寒底的人，吹得太耐冷氣可能會不停流鼻水、打噴嚏和咳嗽，嚴重甚至會誘發哮喘、氣管炎和肺炎等呼吸道疾病 ! 而且，長時間在低溫環境下工作，體內的微絲血管會收縮，令到肌肉繃緊，影響腸胃的活動能力 ! 頸部、手腳等關節位經常被冷風吹住，更會帶來酸痛和無力感 ! 開冷氣最理想的溫度是大約攝氏25 ℃，咁就不會因為冷氣太大而造成不適啦 !

二. 溫差太大造成不適
夏天室外氣溫分分鐘高達攝氏30 ℃ ! 但一入到只有18 ℃至20 ℃的辦公室，溫差大到有成10 ℃咁多，在忽冷忽熱的情況下，頭痛會更加厲害 ! 在高溫的環境下，體內的血管會澎漲，肌肉自然都會擴張，但去到低溫的環境，如貼士一提到，體內的血管就會一下子收縮，令到肌肉繃緊，對於長期身體疲勞、周身骨痛的人，溫差太大肌肉酸痛和頭痛的情況定會加劇 ! 而且，夏天經常下雨，濕左身番到辦公室再吹冷氣，不單止會頭痛，更會容易攝親感冒 ! 開冷氣最重要就是溫度不要跟外面氣溫相差太多，冷氣溫度比出面低2 ℃至4 ℃就夠架喇 !
三. 保暖措施要做足
辦公室太凍雖然就話可以較高啲個冷氣溫度，但公司安中央冷氣的話就不容易解決問題，有時較低一度可以好似雪櫃咁凍，較高一度就變沙漠。所以話，在辦公室一定要準備好長袖外套、頸巾或者披肩，特別是一年三百六十五日都要穿短裙的OL們，身體外露的部份比較多時，着番件外套或者用披肩遮住，就冇咁容易攝親啦 ! 體質不好、屬寒底的人如果仲覺得凍，可以沖杯薑茶驅寒，薑可以有助擴張血管，促進血液循環，幫助身體加熱，但建議不要喝太多，亦不要因為天氣熱而喝太多凍飲，不然會有反效果的啊 ! 最後，活動下身體都可以幫助血液循環，建議可以在座位裡郁動下手腳，甚至出去行個圈去個廁所，都有助身體保暖架 !

四. 保住頭同頸，頭痛唔洗驚
在辦公室工作時頭痛，很多時候都是因為受到冷風直吹和頸部承受了太大的溫差所致。所以，在出入冷氣環境時，最重要的就是用衣物或者頸巾包覆住頸部，就可以避免突如其來的溫差而造成頭痛問題。下雨天頭髮濕左的話，就要在進入辦公室前抹乾頭部或先用熱風機把頭髮吹乾。放左工都可以用熱毛巾敷下頸部，令頸部肌肉可得以放鬆，有助血液循環，咁就冇咁易頭痛啦 ! 如果番工時頭、肩、頸、膊仲係覺得酸痛，可以試下按揉「風池穴」，即後頸兩側，髮際和頸椎的頸部肌肉處，可以幫助舒緩頭痛症狀。
五. 乾燥環境要識做
開冷氣不但會降低室內溫度，更會影響濕度，令到室內環境變得乾燥，甚至令人產生不適。上班族每日長時間對住文件、電腦螢幕，在乾燥環境下，特別是對於長期戴隱形眼鏡的人，眼睛會更加乾澀和疲勞。除了眼睛之外，皮膚都會因為乾燥而變得痕癢，特別是天氣熱出左一身汗之後，和對於皮膚本身不好的人。想對抗乾燥問題 ? 建議可放一杯水在枱頭， 調節一下室內的濕度。上班族用電腦時亦要記得平均每三十分鐘就要望下遠野，眨下眼郁動下眼球，令眼睛濕潤一下。在洗完手之後，都可以趁水份仍然停留在皮膚表面時，用保濕霜滋潤下對手，避免皮膚因為流失水份，在過於乾燥的環境下變得痕癢。

六. 消暑不一定要開冷氣
而家夏天好似越來越熱，室外氣溫可高達30 ℃，炎炎夏日想消暑 ? 又不一定只有開冷氣一個方法的 ! 而家咁興迷你風扇仔，其實風扇真是很好用的 ! 開風扇不但環保節能又能慳到電費，更不會影響室內濕度，令到環境變得乾燥，搞到皮膚痕癢。如果在室內仲係覺得又焗又熱，可以試下開10至15分鐘冷氣，熄左佢後開風扇對流，都可以帶來涼爽的感覺的啊 ! 夏天消暑飲品當然也不能少啦 ! 但是不是講緊凍飲 ! 想清熱解渴，最好還是飲番啲健康有養生功效的自家湯水啦 ! 冬瓜、薏仁、芒果、洛神花和奇異果等都是健康又生津解渴的蔬果啊 !
夏天辦公室開冷氣雖然是人之常情，但成日歎冷氣除了會造成頭痛、四肢酸痛、乾燥和容易攝親感冒等問題外，更是不環保的舉動 ! 不想北極熊以後無家可歸和香港第時冇冬天，就從生活做起啦 ! 辦公室開冷氣較高一度，可以環保啲之外，仲可以慳到約6 % 的電費 ! 而且，今時今日，除左開冷氣，仲有咁多方便又環保的消暑好方法，「冷氣病」仲邊會存在啊 !

文：Noelle So

更多打工仔分享，追蹤 ECjobsonline 專頁 或 瀏覽 www.ECjobsonline.com