【面試小貼士】被問「點解離開舊公司」該如何回答？

好多人都會趁後生，轉下唔同工作，到處嘗試下新的事物，攞多啲經驗。不過，HR或老闆見到你份CV成日轉工，好難唔懷疑你對公司的忠誠度，甚至會因為覺得你jumpy而唔請你！面試時被問到「點解辭職」、「做左咁多年點解唔做落去」、「點解無啦啦轉工」等問題，應該點應對，向老闆證明你既忠心又做到野呢？
1. 公司被收購
好多打工仔最怕就係公司比人收購，在架構重整下會出現裁員潮。不過，公司被收購，同時都可以係一個考慮職業生涯的好時機，事關公司未來的發展前景有機會不明朗，或者新業務的方向不是自己的專長，面試時向老闆提出咁嘅外在因素，相信對方會明白的。

2. 前公司文化保守
雖然話就話辭左職，但都唔能夠在面試時向老闆盡數前公司的不是。建議大家可以稱讚一下前公司的發展，同時提出對行業整體表現下滑或者競爭激烈等的擔憂。前公司的決策文化相對保守，需具有更廣闊的平台或更前衛的模式才能在同行間爭一席位。因而十分認同應聘公司的理念。老闆見你咁有危機意識，又了解本公司的文化，份人夠理性又夠宏觀，點都唔會懷疑你的分析能力喇掛！

3. 能力或理念與前公司不符員工之所以能團結一致，好多時都係因為大家有共同的理念和目標。同一道理，員工認同公司的理念和方向，能力和專長又能在工作上充份發揮，自然就做得長啦！但如果在公司遭到大材小用、人崗吻合率低的情況，理念亦開始跟公司背道而馳，就要考慮下自己仲適唔適合繼續留低喇！相信以能力或理念與前公司不符為理由，向應聘公司說明離開前公司的因由，對方都會接受嘅。

4. 搬遷到外地
不少國際企業經常派遣員工出差，或因業務調整需把公司搬到外地，但有仔女、父母需要照顧的打工仔，點捨得丟下屋企人唔理走去第二度做野呢？所以，以家庭理由辭職絕對唔會有人懷疑，面試官聽到都會明白你係在冇辦法之下先辭職。

5. 職位的生命周期已到
公司有一部份職位是為了配合完成階段性的任務而設立，而不是常設職位。因此，當階段性任務完成之後，該員工就沒有繼續留低的理由，辭職都係無可厚非的事，相信應聘公司都會理解。

6. 公司發展緩慢
員工在一家發展較慢的公司工作，待的時間越長，越無法吸收新的養分。在欠缺發展機會的情況下，離職都是逼不得已的選擇，相信面試官都會了解你的難處。
在同一間公司做得耐，人人都會想轉換下工作環境，但切記在面試時，不能夠以「人工太低」、「經常OT」、「同同事夾唔嚟」、「公司太刻薄」等說法作為離開前公司的理由！但都要解釋得合理啲，等對方覺得你唔係有心想離開，印象分自然會高啲啦！

文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com