【厭伏無邊】煩死打工仔的10件事

「辦公室煩事何其多，返一日工已經遇到好幾個。」就算安守本份，打工仔總會遇到令人感到厭煩同中伏嘅事，好似以下10樣：
1. 無限workload
明明已經依時做好自己要做嘅文件同project，但總係晴天霹靂，無啦啦又多左疊files要你喺限時內完成。冇得un un腳休息下，又要開行turbo做嘢。最攞命有時嗰啲嘢唔係喺自己工作範圍內，但係又要迫住做。跌入呢個無限workload嘅循環真係要叫救命！

2. 麻煩客人
所謂「一樣米養百樣人」，香港唔少職業都要對唔同客人，每個客人都會以唔同態度對你。好彩就遇到隨和又有禮貌，唔會煩到自己嘅客人；唔好彩遇著冇禮貌又多多要求，要呢樣要嗰樣，問三問四嘅客人真係祝你好運。

3. 冷血上司
講嘢涼薄、刻毒，唔關心亦唔會體諒下屬難處。係佢哋眼中，員工只係一樣工具，隨時隨地幫佢哋做事，執頭執尾。唔好諗住有人情講，本身不近人情嘅佢哋見到員工有難都係卸膊落你到。以為上司好似道光咁照住員工？唔係冷血上司囉！
4. 勢利同事
為自己利益不擇手段，勢利同事表面好似好和善，但實際上好多心計，可能會利用同你嘅關係去完成唔合規矩嘅事。亦有啲表面上同你好friend，但暗中對你做唔好嘅事。當你再冇利用價值，佢哋就會唔識你咁，對你非常冷淡。

5. 低位人工
個個都低人工，唔同個個都想低人工咩？每一年都通脹，但又唔見人工升得幾多。仲要好多時自己做嘅同收入不成正比。問幾時加加得人工，又冇回應。俾得家用，衣食住行又慳到幾多？

6. 應酬交際
對住唔熟嘅人要帶住假面具，笑意迎迎咁同應酬佢哋，仲要好多時都係放工時間做。就算有OT補，本來已經攰到爆，第朝又要返工，真係用生命賺取金錢。不過通常呢類應酬都係冇OT，如果個客陰陰濕濕，真係隨時中伏。

7. 早退請假
有時只係小病想休息下，但都要有醫生紙先真係當病；有緊急事想請事假，但要俾上司認為合理嘅所謂合理理由。

8. 旅行手信
去旅行以為可以relax下，但去旅行都要諗住公司嗰班平時冇乜計傾嘅同事。本來買手信係隨心，但唔積口德嘅佢哋會因為你嘅手信幫你做個人宣傳。買匙扣、小擺設又話唔實用，買零食又話冇新意……買俾你係人情，唔買俾你係道理。咪咁乞人憎啦！
9. 去飲俾人情
同買手信一樣道理，隨心就得，但偏偏班人睇到好似一場交易咁，將簡單嘅事情複雜化。如果熟，自己又有能力，俾多少少當然冇所謂；但總有唔熟嘅同事見人都派請帖，仲追魂call咁想「請」你去飲。真係好擾人！

10. 辭職轉工
想辭職轉工都要好來好去。如果自己跟開嘅project唔可以短期內完成，就要搵信得過嘅同事跟進。點開口同老細講又要度下老細心情同講話內容，之後仲要問佢拎返封reference letter。應該點算好？真係頭都爆！

十樣煩事，你又中過幾多樣？想唔中伏？唔……加油！

文：Cherry

更多打工仔分享，追蹤 ECjobsonline 專頁 或 瀏覽 www.ecjobsonline.com