8大Fresh Grad起薪點最高職位

現今係學歷通脹嘅年代，幾乎大部份年青人都有個大學學位揸手，但畢業嘅起薪點人工同十年前可能差無幾，而事實上市面有唔少工種起薪點的月薪已逾2萬，唔想畢業後只係搵萬零蚊？不妨睇吓以下8個對Fresh Grad嚟講幾吸引嘅工種有無一份啱你。
投資銀行iBanker（月薪$45,000～$70,000）
iBanker絕對係令唔少學生趨之若騖嘅工作。喺香港，如果你可以成為iBank嘅Front Office一份子，人工已經超越一般人好多，聽聞最高更有成$70,000！想喺投行工作 ，唔一定要大學本科讀過金融，因為投行有好多不同部門，要求不一。譬如有啲部門著重人際同客戶關係，有啲就可能要法律、會計等方面嘅知識，當然你亦應對金融行業有一定認識同興趣。

政務主任 / AO（月薪$ 49,445）
政務主任（AO）不但起薪點高，而且仲有機會晉升至秘書長或其他首長級職位！投考AO除咗要中英文流利之外，仲要先通過CRE同JRE，之後又要接受幾輪面試、小組討論政策同個人面試。如此荀工競爭當然十分激烈，政府於上年9月招聘40名AO ，吸引近3萬人報名，即平均475人爭一個位！想突圍而出，大家平日要多留意時事政策，訓練自已多角度思考。如果想體驗一下相關工作，不妨報名參加政府舉辦嘅政務職系實習計劃。
各大公司及銀行Management Trainee（月薪$20,000～$27,000）
MT係唔少讀BBA嘅Fresh Grad夢寐以求嘅工作，多間國際企業、大型機構及銀行每年都會招聘Management Trainee，起薪通常都比大學生平均起薪點高，所以每年都有唔少畢業生爭崩頭。一般企業公司都著重應徵者嘅溝通同分析能力，同埋領導才能。大部分MT 培訓為期2年，工作上都會不停有調動，被分派到唔同部門，了解唔同崗位嘅工作性質。完成培訓後，MT大多可晉升為管理層。

註冊護士（月薪$28,040）
近幾年香港對護士需求大增，所以護士嘅人工都跟住水漲船高。而家做公立護士已經有近3萬幾起薪，而私家醫院既人工仲會高啲添！而入學要求較低的登記護士起薪點亦有$20,060，人工都已經比好多工作要高。護士嘅日常工作包括幫病人驗血糖、派藥、打針、執床同洗傷口等等，通常要輪班當值，亦不時要超時工作。

學位教師（月薪$28,040）
一般中學學位教師（GM）嘅起薪點為$28, 040（15點），如果有合適師訓（如PGDE）就可獲加2個額外的增薪點，即$30,945（17點）。至於文憑教師（CM）嘅教職同行政工作相差唔多，但起薪點為$26,700（14點）。晉升方面，CM最高只可升至首席助理教席（PAM，頂薪點為$70,585），而GM最高可升至一級校長（頂薪點為$121,985）。各位畢業生如果有志做教師，就要先讀教育文憑（PGDE），期間要去學校進行實習。唔少人最初都先由教學助理做起，人工大約$10,000～$13,000不等，視乎學校而定。
政府二級行政主任 / EO（月薪$28,040）
公務員是眾多畢業生其中一個最熱門選擇，大多數視AO或EO為首選。投考EO需要經過多重筆試同面試，如同過5關斬6將，2016年就有 1.9萬人申請EO，平均158人爭一個位！雖然做EO成日要調去唔同部門，不過人工高福利好，係唔少畢業生心目中嘅筍工，不過EO同AO嘅晉升之路係唔同嘅，EOII最高可晉升至高級行政主任，而AO就有機會出任決策局或政府部門嘅主要職位。

駐醫院藥劑師（月薪$39,350）
要做駐院藥劑師，除咗要修讀藥劑學課程之外，仲要實習1年，同埋通過3科筆試（包括香港藥劑法例、藥劑執業同藥理學）至可以成為註冊藥劑師！呢個試係由藥劑業及毒藥管理局舉辦嘅註冊考試，每年都會喺6月同12月舉辦2次。駐院藥劑師月薪可達$39,350，仲未包括每月固定津貼添！

督察（月薪$40,880～$42,110）
其實所有大學生一畢業都可以考督察架！如果持有學位或副學士學位等學歷，起薪點就以$40,880計算。如果喺綜合招聘考試CRE中，「中文運用」同「英文運用」試卷合格，起薪點就以$42,110起計算。不過督察並唔易考，不但要考體能同上學堂，而且競爭都幾激烈，好似上年7月就有860人投考見習督察，爭190個督察職位。有興趣嘅同學仔可以喺大學時參加定警隊學長計劃，提早裝備自己！
更多打工仔分享，追蹤 ECjobsonline 專頁 或 瀏覽 www.ecjobsonline.com