最怕收到的新年賀禮

農曆新年，大家係咪已經逗左好多利是呢？收利是固然高興，但講到收賀禮喇喎，依家香港人咁高要求，唔係樣樣都啱大家心水，仲分分鐘嫌份禮太cheap、太冇誠意。既然係咁，不如整個list記低大家最怕收到咩賀禮，以後送禮嘅就自然識做啦！
1. 雜牌朱古力
好多冇牌子嘅朱古力禮盒，包裝係就係幾靚，只弊得個樣、冇內涵呢！食落去得個死甜味，又假又唔好食又硬掘掘，咁唔好食又要嘥錢買嚟送畀人，何苦呢？

2. 雜錦鐵盒曲奇
好多人貪啲雜錦曲奇又大罐又多款式，都會買嚟當賀禮送畀人，收到就真係恭喜你喇！罐曲奇應該食到2046都食唔完，夠曬抵食！只係怕你未食完就先血糖高、肥足10磅。

3. 糖果
新年本身就已經食好多糖，你仲要一大盒、一大罐咁送軟糖、杏仁糖、拖啡糖、利是糖、人蔘糖畀人，真係見到都反胃！仲要年年都係喺超市和便利店買糖果禮盒，有冇新意啊你？

4. 蛋卷
又係食到2046都食唔完嘅禮盒，一罐蛋卷10舊牛油，食落肚問你死未！收到嗰陣簡直就想即刻退返畀對方！
5. 生麵/蝦子麵/鮑魚麵
本身都唔係好食蝦子麵、鮑魚麵呢啲，依家一下子收成盒10幾個，真係唔知點食好。咁鍾意送麵，其實不如cheap cheap哋送啲即食麵或者杯麵禮盒套裝畀我，食嘅機率應該會大好多。

6. 冬菇/鮑片/海味
雖然冬菇、鮑片呢啲都算係貴價嘢，但係你送畀我，我又唔會點煮，又唔係成日食，最後咪又係嘥嘢！想送不如送畀我阿媽，佢收應該會開心過我收。

7. 日式草餅
平時行開啲零食舖和日資超級市場，都會見到好多日式甜心禮盒，靚就係幾靚，但睇個樣都知一定甜耶耶、個味假到死啦！唔好食又要買畀人食，買得咁求其不如唔好買！不過如果係喺日本買返嚟嘅手信，我又唔驅喎！

每年新年，香港人都會掉好多過年禮盒，其實既然唔想收，或者食唔曬，不如大家有共識唔好買賀禮，或是將賀禮轉送畀有需要的人，慳返啲錢之餘，仲可以為環保出一分力，咁樣過年至開心架嘛！

文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com