​寫to-do list唔一定係好事？5個可能弄巧成拙的工作好習慣

唔少打工仔為了提高工作效率，都會建立自己的一套習慣，例如寫to-do list、將文件分門別類等等，表面睇起上嚟都係好嘅、正面嘅習慣，但係有時反而呢啲習慣，先係拖慢你工作進度、會令你弄巧反拙的原因！
1. 寫to-do list/check list
好多人都會建議打工仔返工寫to-do list或check list，一嚟可以按時間和重要性分配好工作；二嚟可以提醒自己有咩要做，唔驚有甩漏，但寫to-do list又係咪真係咁幫到你工作呢？講真又唔一定！習慣呢家嘢，本身就要持之以恆先有用，好多人可能寫1、2日就已經堅持唔到；此外，計劃永遠趕不上變化，寫完to-do list之後唔排除會有新嘅工作入嚟，咁你個list咪又要重新再排過？而且，寫完個list，試問又有幾多人又真係做得曬？

2. 將文件分門別類
好多人可能都會有將文件分類的習慣：A project嘅、B客人嘅、C firm嘅proposal嘅、做好和未做好嘅如此類推，分類唔係唔好，只係同寫to-do list一樣道理，分完類咪又係成日會有新嘅文件入嚟，咁樣分落去都唔係辦法。計我話，每日淨係需要將嗰2日要完成的文件拎出嚟做，再額外加1、2個quota for突發嘢，咁就已經足夠喇！
3. 盡快回覆客人email或電話/盡快完成工作
喺香港，快當然係好事，但係快唔一定代表準。你好快覆到個客，或好快咁做好手頭上的工作又如何，冇double check，最後錯漏百出咪又係衰！所以，既然對方畀咗個限期你，你就應該好好利用，例如個客朝早同你講，6點放工前要覆返個email畀佢，咁你就唔洗急住中午前就已經要覆佢，可能留到下午3、4點先打個email，再加5至10分鐘proofread封email先send出去，咁就啱啱好喇！

4. 保持桌面整潔
張檯整齊清潔固然係好，但一張亂七八糟的書桌，反而先畀到人安全感，打工仔在一個熟悉的環境下工作，更能有助提升工作效率。而且，桌上的物件放咗喺邊你都一清二楚，唔洗驚因為執乾淨張檯，而唔記得咗啲嘢放咗喺邊。因此，張檯笠笠亂，有時反而係好事嚟架！最緊要就係做到嘢，自己又知道啲嘢放咗喺邊。

5. 迎合他人、改變自己
出到嚟社會做嘢，好多人都會同你講，想撈得好就要多奉承其他人，但有時對方講嘅嘢未必啱得曬，係咪就要為了迎合佢哋而冇咗自己呢？答案係唔需要嘅。冇錯，為咗埋堆、搏老闆歡心，打工仔好多時都要改變自己，但遇着自己認為啱嘅事，就應該堅持，勇於提出嚟，咁辦公室先有火花架嘛！
凡事都有好、壞兩面，習慣都一樣，好的工作習慣，有時反會拖低你的工作效率。所以，好多嘢唔係人哋話好就一定係好嘅，要試過先知適唔適合自己架嘛！

文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com