女上司會遇到嘅難題

依家全世界都喺度講緊兩性平等：男人做得到嘅嘢，女人都可以做得到；男人做得CEO，女人都可以做人地阿head；男人可以做建築師，女人都可以番地盤工幫手起樓。只不過，女人做高層固然係勁、係叻，但有啲煩惱，係女上司先至會明白，亦都係女上司先會經歷到。所以，做到好似Mall姐咁勁、咁高人工，工作上都未必咁enjoy架！
1. 被睇小、被質疑能力
做得高層就梗係要成日出去見大客、傾大生意、同人social架啦！唔好以為social淨係出去同人食餐晏仔咁簡單，女上司出去social，通常都唔係咁easy：同其他公司嘅老細傾合作，對方可能會因為你女性嘅身份，覺得你唔係好信得過、唔係好做得嘢，繼而歧視你，唔放心同你合作，甚至可能會恃住自己係男性，就覺得自己高高在上啲，傾親咩都蝦你、壓你價！恃住你會感情用事，容易心軟、畀人食住！所以話，女上司真係唔易做架！

2. 被調戲、下屬不與自己合作
女上司就好似以前讀書時期嘅女組長、女prefect咁，總會有啲男同事、男下屬覺得恰你好好玩，恃住你一定奈佢唔何，又唔夠佢惡，你話1，佢就偏要話2；你叫佢行東，佢就偏要行西，咩都唔聽你枝笛，更加唔好講合作，甚至有啲女上司會面對男性，包括下屬同老闆嘅調戲、性騷擾，或者畀對方叫去陪佢去wet。睇嚟做女上司，真係要有gut、夠霸氣先治得住班男人！
3. 被恥笑為老姑婆
做得女上司，就梗係要擺個款出嚟，個人mean啲、harsh啲、惡啲，班細嘅先至會識驚，無奈背後嘅代價就係會畀人暗地裡笑你一世嫁唔出、成世做老姑婆、冇人同你食lunch、女魔頭、工作狂、逼人OT等等。所以話，做得呢個位，唔大器啲都唔得！

4. 容易被指偏袒某方
女性始終比男性感性、細心，做事甚至會比較龜毛、吹毛求疵啲，因而容易畀男同事覺得你偏幫女仔，下下都嫌啲男下屬做嘢唔夠仔細同企理；但係有時或者會相反，有啲女上司可能因為平時太dry，一見到啲男下屬就發曬姣咁，咩都話OK；對住啲女仔就黑口黑面，講咩都唔啱佢心意。睇嚟女上司要得到下屬歡心，首要做嘅係公平對待每一位員工，咁先唔會畀人話大細超！

5. 難以平衡工作和生活態度
平時喺公司mean慣人，職位又高，好多女上司放左工都會唔慣嬌滴滴咁同另一半講野和相處。自己嘅身份好似一下子變得低微左，同對方講野又好容易變得好公式化、好理性，長久咁落去真係會好影響兩個人嘅關係。而且，有啲男人或會因為另一半係高層而感到自卑，甚至會埋怨對方經常寄情工作而忽略左佢，或是成日將公司嗰套模式搬番屋企，喺屋企都當自己係CEO咁要所有人聽佢枝笛，根本冇當過佢係男朋友/老公。所以，咁多位女上司們，收左工就應該放低所有工作，還番一個賢淑、溫柔、體貼嘅女朋友/老婆/媽媽比男朋友/屋企人喇！
覺得做Mall姐好有型、好有威嚴？你只係睇到表面咋！好多煩惱和困擾，只有女上司先會真正明白到！如果話做女上司要成日被人性別歧視、被人質疑工作能力、被男同事調戲、被人嘲笑、被另一半指責，你仲係咪咁恨做女CEO？

文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com