【Why歪？】被合理化職場奇怪現象

有啲事，你我本身都覺得唔合理，但因為長時間浸淫喺一個充滿唔合理事情嘅環境下，你同我都會慢慢將被歪曲嘅事情合理化。而被合理化嘅奇怪職場現象有：
1. 老馮要OT？
如果限期內做唔到自己職責範圍要處理嘅事務，當然要OT完成返。但如果因為唔趕急，又唔係自己職務嘅事而OT，就真係唔合理！臨收工前上司要你幫手做多一陣嘢先走。做一陣即係做幾耐？咁要睇份文件有幾厚，自己手腳有幾快，老闆心情有幾好。有時佢哋仲會俾喺限時內冇可能完成嘅工作你，仲嚇你做唔曬唔好諗住計OT。唔想OT？通常老闆會覺得你冇上進心，又唔顧全大局。但係大局都有自己，點解有冇人關顧自己處境？

2. 帶飯食=自閉？
對於因為工作而冇得返屋企同家人食飯嘅打工仔嚟講，可以食到住家飯盒係最美好—健康、好味、慳錢。不過職場總有個思想係「帶飯食即係唔肯同人social」— 當你班同事全部出去食lunch談天說地，自己一個留喺office食飯盒。但其實係咪一定要出去同同事食lunch呢？如果班同事傾計內容都係是非，完全唔啱傾，係咪要迫自己融入其中呢？而且帶飯食唔一定同同事零交流，返工做嘢甚至放工都有唔少時間可以談天說地，係咪只係得lunch time先得呢？
3. 做埋你嗰份？
無論係同事定上司，總有試過俾人叫幫手。可能係幫少少（少少即係幾多要問當事人），或者幫佢做埋成份嘢！不過，份嘢好似唔關我事，做得慢係你自己問題。Team work唔係咁解，更何況「幫係人情，唔幫係道理」喎！做得好，個功都冇我份啦！

4. 小學雞上身講是非？
同某位同事好傾啲又俾人傳有嘢，俾老闆讚賞又話靠擦鞋上位……辦公室總有呢類無中生有嘅事非，你一個眼神、一句說話、一個舉動，分分鐘俾人監視住。不過行得正，企得正，唔需要因為是非精影響到自己！

5. 準時放工唔係咁好？
做曬所有要做嘅事又夠做放工，仲唔走咩！當你想早走，就有同事提你：「唔好咁早走呀，老闆未走。」今次真係「黑人問號」— 老闆未走關我咩事？我都做曬份內事。大家又有冇諗過咁樣浪費時間之餘，其實老闆可能會覺得你工作能力慢，唔可以放工前做完成呢？

6. 唔好嫌人工低，只係俾機會你學嘢？
資本家壓榨勞力，總會將歪理包裝得好美好。做任何事都可以學到嘢，因為咁人工就要低？況且學嘢同時，自己都有賣力付出。依家出嚟打工唔為人工唔通為咩？通漲咁勁，又要俾家用，又要交雜費……唔同你講金唔通同你講心？最離譜係一啲公司年年同人講淨盈利增長幾多，但又唔慰勞員工。
睇完係咪成個人醒曬？仲有更多被合理化嘅奇怪職場文化，不過要等眼睛雪亮嘅你好好發現喇。

文：小C

更多打工仔分享，追蹤 ECjobsonline 專頁 或 瀏覽 www.ECjobsonline.com