【估佢唔到】打工仔工作效率最高的時段竟然係…

大部份時候，都係聽啲打工仔講返工有幾忙、有幾辛苦，好少聽人講工作係會有精神，或是好有效率，但原來唔講唔知，係一日裡面，其實都有幾段時間係打工仔工作效率最高嘅時候，把握到嗰幾個時段認真工作應該可以快人一步，理想達到！
工作效率最高峰： 7:00a.m. – 11:00a.m.（每天）、星期一（每週）
雖然一大朝早要起身返工好眼瞓，但原來我們的大腦和身體，早上7點就開始進入工作模式，直至到早上的11點。打工仔喺呢4個鐘頭入面埋首工作，能較易集中精神，加上早餐歎完杯提神啡，要達到工作效率的最高峰？絕對冇難度！所以，好多公司每日有9.7%的工作項目，都是在這段時間裡面完成。難怪有人話早上11時，是打工仔生產力最高的時段啦！由此可見，有咩重要或urgent的工作，趁住一大早工作效率最高的時候完成，定能事半功倍！而以週期嚟睇的話，雖然大家成日都話blue Monday、最怕星期一，但打工仔在週末休息咗2 日，叉足電再返工，反而更能專心工作，星期一自是整個星期工作效率最高的一天。

工作效率放緩：11:00a.m. – 4:00p.m.（每天）、星期二至四（每週）
接近中午時段，因為放lunch的關係，大家都開始放鬆，因此早上11點至下午1點的工作效率會回落，就算下午2點左右重新投入工作，始終飯氣攻心，個個開始想恰眼瞓和容易分心，工作效率都是不及早上的高。而打工仔連續工作了3、4日，生產力自然都會下降，工作效率亦會隨之回落，一日低過一日。
工作效率最低：5:00p.m. 打後（每天）、星期五（每週）
臨近放工時間，大家都準備收工，諗緊陣間去邊度食飯、shopping、睇戲，自然變得非常心散，工作效率自然就降至最低。呢個時候老細如果臨急嚟call大家開會，或是有份急件要你處理，睇怕做到第二朝你都做唔完喇！同樣地，臨近放假，星期五大家都冇乜心機做嘢，工作效率自然大趺！有研究顯示，星期五的工作效率，會比星期一下跌20%添！

最後再講多少少冷知識畀大家聽啦！你以為一年之計在於春，打工仔在年頭的工作效率會是最高？不好意思，反而1月是全年工作效率最低的月份，或許是年頭不少公司要制定全年的工作方向和計劃，處理工作的速度會比較慢吧。而講到整年工作效率最高的月份，竟然係10月！甚至乎成個秋季（9月至11月），打工仔都會十分拚命去工作，唔知係咪因為臨近年尾，多節日，又多假放，又趕住收爐，所以大家特別認真呢？

睇到呢到，唔知大家有冇對星期一改觀呢？始終工作梗係愈快完成愈好啦！以後大家要好好把握每個星期一和每個朝頭早做嘢喇！咁樣先可以無後顧之憂咁收工和enjoy你個weekend架嘛！

文：Noelle
更多打工仔分享，追蹤 ECjobsonline 專頁 或 瀏覽 www.ECjobsonline.com