6種要經常扮惡的工作

無論嗰日心情有幾差，做sales、服務員、收銀員等服務行業都一定唔可以黑面，對住客人幾時都要保持笑容，笑足全日真係面都僵埋。唔想扮笑扮得咁辛苦？咁不如試下扮惡啦！份工剩係日日企喺度扮黑面，做得過喎！仲啱曬啲天生黑面嘅朋友去做添！
1. 海關人員
大家每次過關嘅時候，有冇發現啲海關人員全部都好似好惡、乸口乸面咁呢？其實扮cool係佢地工作嘅一部份嚟架姐！唔擺起個款點嚇得到啲犯人呢？特別係美國啲海關人員，問問題都惡過人，大家去到千祈唔好亂講野或者嬉皮笑臉啊！

2. 懲教人員
老師要管好一班學生已經唔容易，懲教人員要睇實一班曾經犯事嘅在囚人士就更加吃力！溫柔少少就好易比佢地食住、冇曬威嚴！所以，懲教人員一定要有幾惡扮到有幾惡，等班在囚人士知道自己唔係好惹，聽曬自己枝笛。

3. 警察
警察冇番少少威嚴又點鎮得住啲蠱惑仔呢？由其是夜晚去巡街、巡酒吧、巡球場，唔兇啲蠱惑仔幾句佢地就實以為啲警察冇料到。所以，身為警察，點都要建立下形象，等啲犯一見到警察就知驚。
4. 訓導主任
細個做學生嗰時最怕就係比訓導主任捉。其實訓導主任都係老師一個姐，有咩好怕呢？怕就係怕佢扮惡靠嚇個樣囉！訓導主任唔扮得cool啲、惡啲，班學生點會識驚？有個訓導主任鎮住，班學生跩極都有個譜，唔敢踩訓導主任嘅底線嘅。

5. 保安員/保鑣
唔好以為全世界嘅實Q都好似你樓下個看間咁nice啊 ! 做拍賣行、珠寶展嘅保安人員，或者做有錢人、明星嘅貼身保鑣嘅，都係好有架勢、好嚴肅、唔開得玩笑架 ! 話曬做得保安員同保鑣嘅，都要經常一眼關七。人命攸關嘅事，都係睇緊啲好，唔係就好容易比賊仔有機可乘，或者令到client有危險。

6. 拳擊手/武師
同人打拳賽或者比武，就算冇實際，都要有姿勢 ! 擺個兇狠啲嘅樣出嚟，對方就好容易比你嚇窒，以為你好難應付，繼而敬你三分 ! 所以，有時就算得個樣，都唔代表一無是處架 ! 起碼可以比到個下馬威人先啊 !

黑面一定係唔好 ? 咁又未必 ! 扮惡、黑面、扮cool有時都只不過係工作所需。卸下面具，相信香港人都係外冷內熱嘅，大家唔好比外表呃到啊！
文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com