【語言偽術】解讀職場話中話

職場係一個充滿藝術嘅地方……講緊嘅係語言偽術！唔知點解上司同事總係唔有話直說，係要人哋估佢究竟想講乜。今次為大家解讀6句常見話中話，睇下佢究竟想講乜！
1. 「幫手做少少嘢。」
你估真係純粹要你幫下佢，只係做少少嘢咁簡單？到你真係出手嘅時候，佢就將所有嘢交晒俾你，你自己獨力處理。但係到時功就佢拎，鑊就你孭。如果係同事同你講，或者都可以say no。不過如果係老細同你講，就真係no都無得say喇。

2. 「留多陣先收工。」
或者上司都係不甘寂寞嘅人，佢哋最鍾意叫班下屬陪佢地開OT，順便幫佢哋分輕重擔。OT幾耐？永遠唔會有一個實際嘅答案，但留得喺度，就預咗有無窮無盡嘅文件等你處理！

3. 「呢個計劃可以諗下。」
係呀！淨係諗下好啦！唔好諗住真係批呀！因為一係你個idea真係好唔掂，但佢又唔想你傷心所以就婉轉啲咁講；一係到時佢會用咗你個idea再將佢重新包裝，咁就到佢去拎彩架喇。
4. 「做錯唔緊要。」
真係唔緊要？最多咪出warning letter處分你或者炒你魷魚。聖人都有錯，但你唔係聖人。就係咁簡單。

5. 「呢排屋企有事？」
如果突然有人咁問你，唔係因為佢愛屋及烏，關心埋你屋企，而係見你呢排工作態度或者能力大不如前，想知你搞乜東東！

6. 「你好似同佢好friend咁喎。」
佢真係好留意你，連你同邊個傾得埋都咁瞭如指掌。甚至會懷疑你同對方有啲咩陰謀都唔定！

下次聽到呢啲話中話，就知應該點應對啦！

文：小C

更多打工仔分享，追蹤 ECjobsonline 專頁 或 瀏覽 www.ECjobsonline.com