【魚與熊掌】工作家庭難兼顧 雙職父母的掙扎

今時唔同往日，女性結咗婚唔一定要留喺屋企相夫教子，生咗小朋友，一樣可以照返工、做女強人，加上自己父母可以幫手湊細路，亦可以請返個工人打理家頭細務，咁嘅話，就算兩公婆都出曬去做嘢，都唔洗擔心屋企冇人睇，但實情係咪真係咁理想呢？話曬都孭住頭家，工作同家庭兩邊都有責任喺身，做雙職父母都唔係咁易架！
1. 少了時間陪家人
兩公婆都要返工，自然少咗時間同仔女相處，仔女對住公公、婆婆、爺爺、嫲嫲和工人姐姐的時間，分分鐘仲多過對自己爸爸、媽媽。冇計啦！日日返工都要做足9個鐘，唯有趁週末陪多啲屋企人，或是早啲起身，送仔女返學，爭取多啲時間同佢哋見面啦！

2. 財政上多了負擔
屋企有小朋友要照顧，學費、書簿費、興趣班、玩具、食飯，樣樣都係錢，以前返工搵嘅錢都係啱啱好夠食夠住，依家多個人要養，錢財負擔自然都重咗。李麗珊都話啦！養大一個小朋友要400萬架！唔畀多啲心機做嘢，邊有錢供書教學啊？

3. 經常要在工作和家庭中作取捨
書都有得你讀：魚與熊掌，不可兼得，工作V.S. 家庭，有時逼不得已都要二揀一：公司想升你做manager，人工高好多，但要成日出trip；有份文件要趕，但今日係個仔嘅生日，應承咗佢今晚要一齊慶祝；花了好多時間在工作上，錯過了子女成長等等。一年365日都要經常在工作和家庭中作出取捨，雖然話冇嘢緊要得過屋企，但當真係要作出選擇嘅時候，就真係唔係咁容易。
4. 不用上班的時候都不能好好休息
以前一個人自由自在，weekend唔洗返工可以瞓到黃朝八晏，淨係歎喺張床到一日，唔食飯、唔沖涼都得；如今有頭家，唔洗返工就係family time，要幫仔女諗節目，帶佢哋去公園放電，去主題樂園玩，接送佢哋去上興趣班，就算留喺屋企，都要陪佢哋玩，煮嘢畀佢哋食，就算你想瞓晏啲，都會畀佢哋嘈醒。

5. 個人發展/生活受到限制
上面都有提到，雙職父母好多時都會由於家庭關係，婉拒晉升、進修或到外地公幹的機會，往壞處想，工作表現和個人發展或會受到限制。而且，有了家庭之後，有friend約你放工去飲杯嘢，你可能都會三心兩意，一方面又想去放鬆吓，另一方面又唔放心屋企。雖然家庭是十分重要，但各方面平衡，生活才會健康啊！其實帶埋小朋友，約個friend去快餐店見個面，都是一個不錯的活動啊！

做打工仔不容易，做雙職打工仔就更加困難！工作和家庭要同時兼顧，就好似同一時間打緊兩份長工咁，想話唞啖氣都冇時間。不過相信咁多位全職爸爸、媽媽，為了子女，辛苦啲都覺得值得嘅。

文：Noelle So
更多打工仔分享，追蹤 ECjobsonline 專頁 或 瀏覽 www.ecjobsonline.com