​亞洲5大OT之都

打工仔最唔鐘意嘅事有唔少，其中一定要數加班OT。OT文化可以話係亞洲文化一種，甚至因為咁有西方媒體講過：「亞洲人好鍾意返工，好勤力。」㖭！喺咁多個亞洲地區，邊個地方OT最多，OT情況又係點？一於倒數睇睇「亞洲OT之都」：
第5位：韓國
韓國社會競爭大，當地人仲係學生時就已經要接受高壓教育，呢樣到佢哋投身職場都未有改變。首爾佢哋OT方式都相當「多元化」，除咗一般超時留守office處理公務，仲有大大小小社交型OT，為嘅係同同事上司打成一片，搏取好印象。OT文化盛行，首爾政府今年3月30日開始，強制公務員每星期五晚關閉電腦，不過依然有七成職員申請希望政府豁免佢哋。

第4位：日本
OT文化由七十年代日本經濟起飛開始出現，加班工作被視為成功出色，所以一直都有人。即使政府將每周標準工作時間減少，但OT文化仍然根深蒂固，連夜留守office簡直係常事，導致「過勞死」現象—2013年年底先有年輕女員工因為一個月內連踩一百個鐘以上暴斃，消息震驚全球。《牛津詞典》甚至收錄「過勞死」英文拼音「KAROSHI」，可見日本OT文化有幾「出名」。
第3位：台灣
近年多港人移民去台灣，貪佢生活環境好、節奏較慢，但原來台灣OT情況都不容忽視。造成咁，因為台灣人職場文化係工作效率高嘅會接到更多工作；工作效率低嘅會唔甘心，又因為公平問題而接獲同等份量嘅工作。不間斷工作導致台灣成為其中一個OT時數高嘅城市。

第2位：新加坡
新加坡人非常獨立，無論遇到大大小小問題，佢哋盡可能都靠自己獨力解決。想要升職就要有極高效率，簡單講係短時間內完成大量工作。為咗盡手做好手頭上嘅工作，新加坡人非常專心，基本上除咗公事，佢哋喺辦公室係唔會講嘢。無形中造成高壓工作空間，好多新加坡人都因為咁覺得大壓力。

第1位：香港
喺生活指數高，乜嘢都要講錢嘅香港，「朝九晚六」已經係夢，全因OT已經成為例行公事。唔少行業，好似會計、公關、傳媒等好多時候都雖然開OT。雖然法例有保障打工仔OT有得補水補假，但係唔少公司會以「冇人迫你」為由唔肯加OT錢同假期；但係短時間內做唔曬大量複雜費神嘅工作，俾人鬧咪又係打工仔！

盡責投入係好事，但識得平衡生活都好重要。各位，要記住Work-life balance呀！
文：小C

更多打工仔分享，追蹤 ECjobsonline 專頁 或 瀏覽 www.ecjobsonline.com