【​笑談廣東話】做到隻積咁嘅樣？有趣職場術語講你聽

打工仔搵食有得艱難？歌都有得你唱啦！半斤八兩，做到隻積咁嘅樣！但其實做到隻積咁嘅樣會係咩樣呢？點解要係積呢？坊間仲有好多好有趣嘅職場術語，你又識唔識得曬呢？
1. 做到隻積咁嘅樣
呢句術語係源自1976年的一套喜劇《半斤八兩》的主題曲《半斤八兩》，曲詞皆由許冠傑所創作。最為廣泛通傳的一個講法，就係因為啤牌入面嘅Jack（譯作「積」）可指僕人和雜工，「做到隻積咁嘅樣」即係話打工仔做到好似僕人、雜工咁辛苦。另外，由於「積」係英文Jack（千斤頂）嘅諧音，所以啲人就話打工仔好似用嚟舉起重物進行維修嘅千斤頂一樣，反映佢哋工作壓力大、工作量過多。

2. 做到隻屐咁
「積」都話講得通，但打工仔點會做到似隻鞋咁呢？原來係因為打工仔做嘢成日都要頻頻撲撲，疲於奔命，所以就有咗呢個說法，話打工仔做到成隻屐咁。

3. 做到隻狗咁
呢句應該大家都聽得多，但點解要係狗呢？大家都心知肚明，其實狗嘅生活都唔係好辛苦啫！比起打工仔日日朝9晚6加OT，做狗都不知幾幸福。其實「做到隻狗咁」呢個說法，係源自西方嘅。西方有一個講法叫 "it's a dog's life"，即係過住狗一般嘅日子，形容生活苦悶，連披頭四都喺歌曲 “A Hard Day's Night" 入面唱到 "It's been a hard day's night, and I've been working like a dog."，唱到街知巷聞，唔怪得中國人都要將佢譯返做中文，話打工仔做到成隻狗咁啦！
4. 燉冬菇
大家都知「燉冬菇」有「降級」嘅意思，但點解會係「冬菇」呢？原來呢個term係源自警察呢個行業。早年香港華籍警員嘅警帽，係沿用清朝軍帽嘅款式，形狀似足冬菇。若高級啲嘅便衣警察被降職，佢哋就要做返軍裝警察，戴返頂冬菇警帽，而「燉」係「退」嘅諧音字，降職於是乎就叫「燉冬菇」喇！

5. 炒魷魚
學生哥最怕食東星斑，咁打工仔一定最怕老細請食豉椒炒魷喇！點解解僱會叫「炒魷魚」架呢？咁係因為炒過嘅魷魚會捲埋攣起，十足十古人出遠門用嗰啲包袱咁樣，所以啲人就用「炒魷魚」嚟形容老闆解僱員工，叫對方執包袱走咁解。

廣東話博大精深，唔止職場術語，坊間仲有好多好鬼馬、好耐人尋味嘅歇後語或俗語，等住大家慢慢去發掘架！

文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com