如何應付麻煩同事？

返工會遇到好多同事，生涯中總會遇過幾個麻煩人，譬如工作能力低，鍾意講人是非，卸膊，冇個人衞生，經常搏出位，擦鞋嘅，老屎忽等等，總之office裡面就乜人都有，要應付唔同類型嘅麻煩同事，就要用唔同嘅方法！
1. 擦鞋仔
冇乜邊個老細係唔鍾意畀人擦鞋嘅，咁奉承老闆都係一種生存技能嚟嘅，之但係有啲人為咗搏老闆歡心，淨係識得見風轉舵，一有咩唔妥，連同事都可以出賣。所以，應付擦鞋仔嘅唯一方法，就係唔好畀佢有擦你鞋嘅機會，你有咩好idea，千祈唔好同佢分享，對方對住你一定係狂讚你，但當你條橋畀老細ban咗嘅時候，佢一定會企喺老細嗰邊踩返你轉頭。因此，冇比較就冇傷害，同擦鞋仔保持距離，佢見冇嘢可以利用到你擦老細鞋，就會搵過第二個目標架喇！

2. 卸膊同事
公司同事平時唔多做運動，偏偏「耍太極」就好鬼在行！問親佢嘢都話唔關自己事，一係就混水摸魚側側膊就閃咗去。對住呢種同事，可以有2種應對手法：一就係搵一次扮好心，喺佢有需要嘅時候助佢一把，等佢一世都差你人情，你有嘢要佢幫手嘅時候，佢就一定唔好意思say no；二就係狐假虎威，撻老闆個名出嚟，講到明係老細嘅order，諒佢都唔敢拒絕你架喇！
3. 是非精
有人嘅地方就會有是非，雖然人言可畏，但畀人篤背脊，你都做唔到啲咩，加上把口生喺人哋度，你都制止唔到。所以，你只能夠用行動去證明自己，例如畀人誣蔑你返工成日蛇王，你就更加勤力啲做嘢；畀人唱你做嘢冇嚟交帶，喺team project你就多啲同組員溝通合作，流言自然就會不攻而破。

4. 邋遢同事
有啲同事總係冇啲手尾，又冇嚟衞生，食完個飯盒幾日都唔掉，張檯又鬼咁污糟，掂過佢份文件都要消毒返隻手先得！對付呢種邋遢同事，一係就兜口兜面叫佢清潔返張檯；唔想咁直接嘅，可以喺聖誕或者佢生日嗰陣，大家一齊夾份買啲消毒液、濕紙巾、垃圾膠袋畀佢，等佢培養吓整潔嘅習慣。

5. 老屎忽
每間office總有幾個老屎忽，喺公司做咗十幾廿年，恃住自己係老臣子，就日日都係返工等放工。不過，對住佢哋又唔洗咁抗拒嘅，佢哋通常都係揀人嚟針對，耐唔耐討好吓佢哋，等佢對你有好印象，話唔定以後喺公司都會照住你呢！而且，佢哋做咗咁多年，同老細點都有啲交情，可能仲會喺老闆面前美言你幾句添啊！

6. 工作能力低不怕神一樣嘅對手，只怕豬一般嘅隊友！對住啲豬隊友，話佢又怕傷佢自尊心，唔話佢啲嘢又做錯曬！唯一嘅應對方法，就係將最簡單嘅工作分畀佢做，等佢做完有成功感之餘，又唔怕畀佢一個累全家。係就係其他人辛苦啲，要做最難嗰part，不過點都好過交畀個豬隊友嚟做啊！做錯曬要其他人執手尾仲嘥時間啦！唔畀佢知，都係為佢好咋！

7. 搏出位同事
有啲人為咗吸引同事注意，做咩都誇張過人，目的就係想你留意佢。因此，應付佢最好嘅方法就係ignore佢，咁辛苦做完場大龍鳳，點知冇人捧場，佢就知道要收斂架喇！再絕啲，可以試吓學返佢咁出位，當佢話：「典解嘅？你好叻啊！」你就誇張一倍咁講：「係囉！我都唔知啊！」佢知道你寸緊佢，就唔敢再做到咁揚架喇！

呢個世界咩人都有，有時真係防不勝防。要應付麻煩同事，真係少啲戰鬥力都唔得！希望睇完呢篇，可以幫你補到血，有力fighting啦！

文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com