【食極唔肥】瘦人的煩惱

Keep fit係女仔一生嘅事業，見到其他人瘦過自己，或者食極都唔肥，都會忍唔住羨慕對方，但瘦係咪真係咁值得羨慕呢？其實老套啲講句，要靚唔一定要瘦到成枝竹咁嘅！更何況，瘦人都會有講唔出口嘅煩惱架！
1. 難買衫褲
瘦又點啊？身形冇曲線，個骨架根本carry唔到啲衫，買親褲次次都要自己釘多幾個窿先唔會跌，XS碼着咗上身就好似加大碼咁，件衫幾靚都晾唔起啦！有時仲要被逼買童裝先啱着！唯一嘅安慰就係：買童裝平啲囉！

2. 難操肌
依家個個都興操腹肌、操馬甲線，但瘦嘅人因為皮下脂肪比較少、肌肉彈性較差，想操肌就要比常人進行更多重型訓練、補充更多營養，需付出嘅時間和耐力也會較多，有時可能去足成個月gym room都冇咩見效。所以，瘦人想操肌肉，可能真係要搵返個教練，幫你度身設計一個training好啲喇！

3. 經常被問點解食極都唔肥/係咪減緊肥/點解可以咁瘦
有啲人天生肥，同樣有啲人天生就瘦，你問佢點解食極都唔會肥，佢都答唔到你架！你估佢想架咩？明明食量正常都唔長肉，去親body check都畀人話underweight，你估真係咁好受？見親啲親戚、朋友，佢哋仲會問你用咩方法減肥！對於本身瘦嘅人嚟講真係好無言架！
4. 不知道可以點增肥
唔少過瘦嘅人為咗令身形睇落健康啲，都會有增肥嘅念頭，但偏偏唔知道可以從何入手，食多啲垃圾食物和油膩嘢又唔健康，本身細食，所以就算一日三餐增加食量都冇用，唔通真係要日日鋸扒、飲生油、食桶裝雪糕先會增到肥？

5. 不能捐血
根據香港紅十字會嘅指引，捐血人士的體重必須為90磅或以上，但有啲女仔真係可以瘦到90磅都唔夠，連捐血嘅基本條件都符合唔到，諗落又真係幾灰嘅，睇嚟瘦都未必係一件好事。

6. 生小孩後擔心奶水不夠營養
雖然媽媽瘦定係肥，其實同奶水營養嘅多與少冇幾大關係，但體質太瘦嘅媽媽，始終都會擔心自己嘅奶水會唔夠營養，繼而可能會埋怨自己，又怕BB長唔大等等。所以，太瘦有時都係一種煩惱嚟架！

雖然女仔始終都係會追求瘦，但無論係瘦定肥都好，最重要都係健康。既然瘦有瘦嘅煩惱，肥又有肥嘅煩惱，啱啱好normal weight，又fit又健康唔係更加perfect咩？

文：Noelle
更多打工仔分享，追蹤 ECjobsonline 專頁 或 瀏覽 www.ecjobsonline.com