【職業談】現職消防員話你知
咁多紀律部隊之中，如果要投選最難考部隊，相信消防員一定高票當選。由投考開始到實際執行職務，呢份工作真係超具挑戰性。考慮緊做唔做消防員嘅你睇下今年正式成為消防員嘅Alex有咩教路。
體能測試廣
「我本身有運動底，每個星期都固定游水同做gym。所以當時考消防體，雖然佢涉獵嘅範疇有好多，但我都有一take pass到。」Alex所指嘅「範疇有好多」，係指考消防員單係體能測試就要過兩過。第一關有八項體能測試：20米來回耐力跑、原地跳高最少45厘米、坐地體前伸最少23厘米、一份鐘內引體上升最少3次、一分鐘內雙槓雙臂屈伸即次9次、一分鐘內掌上壓32次、一分鐘內仰臥起坐35次、一分鐘內俯後撑25次、坐地體前伸23厘米。只有通過所有測試，先可以進入第二關。第二關測試同實際消防工作類同，包括跑樓梯、爬梯、穿越隧道同障礙賽。不過未必人人都好似Alex咁一向體能好，咁點算呢？Alex建議：「考前一年開始密住train體能，一星期花五日時間做，最好就游水，操得fit又唔易受傷。」
工作任務多
又唔會日日都有火警困Lift，咁做消防咪好得閒？消防員要做嘅唔止救火同撬開Lift門，動物被困、天災、公眾教育宣傳等都要出動。Alex補充：「好多人成日話我哋得閒到打排球，打排球係因為要練體能。我哋喺消防局入面都有自己崗位，有好多複雜同瑣事都要處理，唔係返工等收工㗎。我哋『返一日放兩日』係因為一返工就返做24小時。」
待遇比例好
睇返政府消防處薪級表，由2017年4月1日起，消防員（員佐級）起薪點為$20,365，做到消防隊長後會再因應學歷有唔同薪金。亦因為消防員係公職人員，所以享有醫療保障、有薪假期同房屋福利等待遇。按照Alex分享完有關做消防員嘅要求同工作內容，有咁嘅人工同福利都唔係冇道理。
文：小C
更多打工仔分享，追蹤 ECjobsonline 專頁 或 瀏覽 www.ecjobsonline.com