權力的遊戲 - 說話決定權力

神劇《權力的遊戲》就要等出年先有得睇，而權力呢樣野，唔一定要靠勾心鬥角或者打個仗贏返嚟，而家跟住小編，同你透過說話玩盡權力的遊戲。
主導講勁多嘢不代表你就係領袖，隨時犯眾憎，反而你嘅內容斷定咗你說話嘅力量，精要嘅有威嚴嘅一句就夠，如果唔係俾你講3,000字都未必有效果， 留意返：說話要中Point有目標。

搵啱時機開聲
有時成班人七嘴八舌傾計，你講嘅嘢可能人哋未必應到你，你再講多次都係冇人收到，咁咪好瘀！

至於第一個衝出嚟發聲，又唔一定代表力量大啲，有時忍一忍，聽一聽，借他人嘅說話上面修飾吓去回應，眾人就會嘩一聲，開始留意你，主要都係唔好成日圍繞着自己嘅嘢講，人哋聽得多都會想走，多啲問開放式問題，關心下其他人嘅事，就可以喺答案上回應佢，好似一個主持，主持係咪有權決定之後講乜嘢先？

首先一定要搵岩一個時間點，係大家有時間去留心聽你講嘢，你唔會喺大家好忙做自己嘢嘅時候，講一啲你想人哋會聽嘅嘢，就算聽完都忙到唔記得，搵一個人係一定會聽你講嘢，喺開始同結束嘅時候望住佢，因為佢一定會俾反應，對你來講形成一種支持力，羊群心理效應，其他人會跟住尊重你，當你贏得被尊重嘅形象，講嘢就開始更有力量，慢慢你就會有權力。
例如briefing 嘅時候無謂嘅嘢唔好多講，特別係時間唔多，好好準備一下事情先後次序，緩急輕重，抑揚頓挫，如果有人走神嘅不妨輕輕拍一下手，帶返大家個注意力返嚟。

講笑都要有內涵養份
領導完全唔講笑？唔覺得有幾高高在上，只會俾人覺得你份人古肅離群，適當嘅幽默感其實係幫你嘅個人魅力加分，只要一開始人哋buy你，如無意外，以後講嘅嘢通常都會buy落去，三不五時俾人聽得出你嘅轉數，自然唔敢睇唔起你，佢哋都未必接到你下一句，但遇著有時唔啱傾或者自己唔識嘅，可以試吓做聆聽者，有時交支咪比人哋既顯得你有容人之量，枝咪都係你經你手決定比出去嘅，亦係權力的另一面，沉默也是金。

文：金金

更多打工仔分享，追蹤 ECjobsonline 專頁 或 瀏覽 www.ecjobsonline.com