【職業談】汽車維修員辛酸史

「Demand大過Supply」嘅汽車維修業，面對客量有多冇少但人手長期短缺嘅狀況，好多公司都等緊新血加入。好多人對呢個行業都唔太了解，今次請嚟22歲維修員健仔同大家講個明白。
有底起步易
一向追開車嘅健仔讀到中三就輟學，之後就報讀職訓局嘅汽車維修課程。「學費唔貴，一年三千蚊有找。」學費容易負擔，呢個為期兩年嘅課程內容打好學員基礎，仲包考証書。而根據健仔所講，大型車房多數要求入行前要讀過呢類課程，所以讀過入門點都易上手。

學徒慢慢上
同唔少講求技術嘅行業一樣，汽車維修業同樣走學徒制。健仔讀完課程掌握到基礎後頭幾年都跟師傅邊做邊學：「可以掂嘅唔會好多，都係組裝機件咁。」佢話同期做學徒有另外兩個人，但先後離職。依家係健仔入行第六年，已經做到學徒組長，陪師學傅整車。當初健仔要學成三年先學得完可以自己一個修車。

肯勞一定得
依家仲未做到師傅位，健仔每日工作超過10個鐘，仲試過幾個星期都冇放假。拎住只有萬頭嘅收入，雖然辛苦，但佢仍然堅持：「多勞多得，我信㗎。我咪得到技術囉！」可以上到萬幾蚊都算犀利，因為健仔底薪本來就只有六千左右，靠佢不斷努力，先上到咁多。相信佢遲下愈做愈專業，一定唔止！
揀大定揀細？
汽車維修廠有大有細，如果真係入行，做邊間會較有前途？健仔暫時只做過一間，就係依家做緊嘅細行。當初揀做細行時佢都度過好耐：「細行冇咁多規限，成日唔夠人要係咁做。咁咪當學多啲囉！」細行資源比較緊張，人手不足，但正正因為自由度高所以吸引健仔入行做。相反，大行就資源多，福利高啲。聽聞做日本公司仲有機會去日本受訓添！

如果你都鍾意車又鍾意維修，會唔會都考慮下為汽車維修輸入新血？

文：小C

更多打工仔分享，追蹤 ECjobsonline 專頁 或 瀏覽 www.ecjobsonline.com