【職場心理學】得佢講無你講 研究：同老屎忽溝通唔到好正常

係同一間公司入面，梗有啲新入職嘅公司同做得耐啲、年紀又相對較大嘅同事架啦。咁係最理想嘅環境，梗係新啲同事可以發揮佢年青新動力同時，啲資深啲嘅同事又可以袋錢入啲後生袋嗰暑。但係依家成日講嗰啲所謂嘅「老屎忽」，泛指一啲淨係點人啃豬頭骨但又唔肯聽人講嘢嘅「資深」前輩喎。究竟職場心理學上又點睇依樣嘢嘅呢？
係認知心理學入面，有一個概念叫知識傳遞（knowledge transfer）。所謂嘅知識傳遞，包括咗分享知識（即係袋唔袋錢入你袋）同埋吸收知識（即係俾唔俾你袋錢入佢袋）。咁到底同年紀大啲嘅同事溝通嗰陣時，對方肯唔肯分享自己知道嘅嘢俾你聽？又肯唔肯接收你個訊息呢？

最近就有一份心理學嘅研究指出，年紀越大係會對知識傳遞嘅唔同層面上有唔同影響架喎。職場心理家學Anne Burmeister嘅研究搵咗450位嚟自唔同年齡層嘅參加者，大至66歲，細至19歲，發現到年紀較大嘅同事比較後生嘅同事更有動力去分享知識，但就少啲能力去做。至於吸收知識方面，數據指出年紀較大嘅同事比較後生嘅同事就無較少動力同能力去做啦。

依個研究證明，原來年紀大咗，確實係會想袋多啲錢入後生仔袋，但唔會想聽人講嘢架。亦即係話人係年紀大咗，真係會變到成個老屎忽咁架。好啦，咁知道咗又點呀？知道咗咪試下去改囉。Burmeister就提出要改善年紀唔同嘅員工嘅知識交流模式，係要由企業出手。公司可以鼓勵年紀大嘅同事跟隨年輕啲嘅同事做嘢，同時又肯定後生同事提出嚟嘅意見及知識。由公司出手，加許雙方嘅表現，促進翻個知識傳遞，咁就可以減低「老屎忽」嘅出現啦。
文：特雷弗
啱啱入職夠一年嘅小薯。讀嘅係心理學，做嘅又係心理學嘅嘢，志願係唔再做心理學嘅嘢。

參考來源：Burmeister, A., Fasbender, U., & Deller, J. (2018). Being perceived as a knowledge sender or knowledge receiver: A multistudy investigation of the effect of age on knowledge transfer. Journal of Occupational and Organizational Psychology, 91(3), 518-545.


更多打工仔分享，追蹤 ECjobsonline 專頁 或 瀏覽 www.ecjobsonline.com