​發嬲會傷肝？喜怒哀樂如何影響健康

打工仔日日要面對客戶同老闆，返工好易畀人激嬲，搵一日開開心心收工已經要還神！不過，返工辛苦還辛苦，都要調節好自己嘅情緒啊！皆因你嬲嗰陣，你嘅身體都會跟住一齊嬲，好影響健康架！
1. 喜→心臟
個人生活得開心、成日都笑固然係好事，適當嘅喜樂情緒亦能令人心曠神怡、血氣舒暢，但如果興奮過度，就好容易生心火，影響心臟，其或會導致精神不集中、失眠、多夢等症狀，嚴重者更會出現神智昏亂或狂亂！唔怪得有時夜晚睇完演唱會，high得制會瞓唔着啦！睇嚟以後happy完都要學識平復返情緒至得！

2. 怒→​肝臟/脾胃
發怒唔單止會死好多細胞，仲好影響肝臟和脾胃健康！生氣和怨恨等情緒，會引致血壓上升、血氣紊亂，或會令人出現暈眩、消化功能不佳等症狀。以後大家遇到咩激氣嘢，記住稍微發洩吓好喇！陣間搞到自己吐血就唔好啦！

3. 哀→肺部/大腸
大家唔開心嗰陣，可能都會匿埋自己一個喊吓、發洩吓，但悲傷過度，從中醫學嘅角度睇，就會引起肺氣虛弱和鬱結，影響肺部功能。而且，經常處於憂鬱狀態，亦會對大腸構成不良影響，令人容易產生胸悶、氣短、呼吸不暢順等症狀，嚴重或會引致潰瘍性結腸炎。
4. 多慮→脾胃
都市人日日夜夜都咁多嘢要煩，真係10個腦都唔夠諗！但一個人太多慮、諗得太多、過度集中精神嘅話，就好容易失衡、減弱血氣功能，影響脾胃健康，或會導致倦怠、胸悶、嗜睡、精神散渙、茶飯不思，甚至係腹脹肚瀉、消化道潰瘍等症狀！所以，奉勸大家都係唔好諗太多喇！好多嘢順其自然吧啦！人生苦短，仲諗咁多做咩呢？及時行樂最重要！

5. 恐懼/驚慌→腎臟
唔理係精神長期過度緊張和膽怯，繼而終日都是處於惶恐狀態；定係精神因受到突然嘅驚嚇，而在一瞬間產生緊張嘅情緒，兩者皆會傷腎氣，對腎臟造成不良影響。腎氣一傷，百病就會叢生，常見症狀包括：易疲累、四肢乏力、腰痠腳軟、尿頻、失禁、暈眩和脫髮等等。既然個腎咁緊要，大家都係唔好成日擔驚受怕喇！練大啲個膽，個腎都健康啲啊！

情緒失調會直接損害內臟，中醫稱其為「內傷七情」。因此，大家想有個健康嘅身體，唔單止要注意飲食和做運動，管理好自己嘅情緒，都好重要架！咪當順便train埋EQ囉！

文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com