手頭工作未完成 如何回覆老闆？

打工仔每日都好多嘢做，未做完一樣已經有第二、第三樣排住隊等你去做，偏偏啲老闆都會以為你係超人，隔一陣就嚟問你啲嘢搞掂未，本身唔忟都畀佢chur到忟！但又冇理由兜口兜面同佢講「未搞掂」架嘛！咁可以點樣婉轉啲同佢講，話畀佢知你需要多少少時間呢？
Yes but no
咩叫做yes but no呢？情況有啲似以前考speaking，就係先同意咗人哋嘅講法，之後再but講返自己嘅見解，老闆都照樣可以咁樣氹住先！當佢問到你嗰陣，你就點都話做完先，之後再補返句「但係呢度要再double check啲嘢」、「呢度等埋個同事confirm就OK」，咁樣老闆聽落都會覺得你係做完咗個job，只係陣間先交得啫！面嗰陣都叫做做完啦！

語言偽術
老闆發唔發你脾氣，就睇你識唔識得講嘢喇！差唔多做完即係未做完，呢啲說話絕對唔可以講出口！你應該要講「大致上完成」，或者「大概完成好，執埋啲濕碎嘢就搞掂」，總之記得美化好成句句子，「差唔多」、「未做完」、「完成咗9成」呢啲就最好避咗佢，轉換成「大致上完成」、「搞埋啲濕碎位就交得」等等，咁樣聽落都好聽啲，唔洗怕老闆一聽到「差唔多搞掂」就扯曬火嘛！
轉移視線
如果真係未搞掂，為免老闆扯火，記得都係唔好同佢講真話，你可以嘗試轉移視線，例如同佢講「大致上完成咗，但有啲地方唔係好明白，想請教吓你……」，老闆見你有要事要請教佢，一定會老屎忽上身，同你長篇大論講故說教，咁梗係啦！難得你cue老闆畀埋位佢入，等佢有機會表演、發表吓偉論教導班下屬，佢多謝你都嚟唔切啦！最重要係你可以成功轉移到視線，等佢唔記得咗要問你份嘢做完未，而且佢講完一大輪嘢，都預咗你會需要時間消化同改你份嘢，自然就再過一排先會再嚟煩你。

Email回覆
如果老闆係用email問你咁就仲好喇！因為email回覆一嚟又唔洗面對面，二嚟回覆嘅方法同用字就更加多元化，例如可以用virtually done、practically done、essentially done等等，係咪比almost finished、not yet finished、almost done高level好多呢？最緊要係睇落好似真係做完咁，老闆睇到都以為你搞掂曬添啊！

其實啲老闆真係唔知係咪太得閒？三不五時就要check住啲員工做曬啲嘢未！不過鬼叫佢係老闆咩？佢開到聲問咪係咁咦答吓佢囉！答到好似冇答過、模稜兩可咁，過到關就得架喇！唔洗太認真哈哈！
💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/4817/%E6%89%8B%E9%A0%AD%E5%B7%A5%E4%BD%9C%E6%9C%AA%E5%AE%8C%E6%88%90--%E5%A6%82%E4%BD%95%E5%9B%9E%E8%A6%86%E8%80%81%E9%97%86%EF%BC%9F.html