CV空窗期幾耐先會響起警號？職場專家話你知

一般CV若果有空窗期嘅話，都會引起HR嘅注意。市場上對於空窗期嘅標準大多唔同，有啲半年就會問，有啲可能見到一年都未必問。既然點都有可能被人問，被人問到嗰陣，應該點答至好？一齊嚟睇下以下三個解答要點啦：
要誠實
無論你有咩原因離開咗職場，你都應該誠實回答。唔好逃避，直接回答。喺你成個搵工嘅過程入面，你應該要保持你嘅真誠，而且展示出嚟。工依啲嘢，嚟完又走，梗係會轉嘅。但如果你係出咗名老實嘅，咁就係跟你一世架啦。

例如你可能為咗照顧頭家同啲細路仔而短暫告別職場。如果你坦誠咁講出嚟，人哋可能會欣賞你嘅顧家添架。唔少HR都聽過好多打工仔將佢哋嘅空檔期吹到天花亂墜。但其實吹到咁大，好易聽得出嘅啫，最緊要係如實咁講。但係當然，最好就將你個理由修改得好聽少少啦。

要有準備
係見工嗰陣，窒口窒勢的確係會輸人又輸陣，就同見工遲到一樣都係會開壞個頭嘅。就好似你準備咗點樣講之前份工做過啲咩咁，面試官會問你趁空檔期嗰陣做過啲乜嘢嘅，所以記住要準備好。只要你有個三個月或者以上嘅空白期，就應該要準備好點羨去解釋架啦。
唔少人會話要湊小朋友又或者照顧病咗嘅屋企人。其他就會話去咗旅行，又或者係休息抖下咁。唔係個個面試官都會明，但梗有啲人會明白做專業人士嘅壓力。或者，佢哋自己都經歷過呢。

無論你係為咗照顧家庭，定係做過義工幫手籌款，又或者去探索世界之大，你都有可能獲得一啲重要嘅技能。試下將依啲技能組織起嚟，再睇下可以點配合到你見緊嗰份工嘅要求啦。當你見緊工嗰陣時，就可以拎翻出嚟講啦。

記住，要真誠，係一個非傳統嘅地方最容易得到一啲有用嘅經歷：義工，社區工作，又或者係照顧家庭。講多啲依啲工作以外嘅技能，係會顯出你係一個更全面嘅人。

要有自信
雖然要你解釋點解自己無工翻，尤其係當你俾人遣散或者被人炒嘅時候，好大機會會令你覺得唔舒服，但你唔需要驚嘅。CV空窗期唔係你想像之中咁罕見嘅。如果一間公司唔明白經濟衰退嘅話，又唔體諒員工嘅話，或者都唔係好啱你去做啦。

無錯，要解釋點解無工翻係會令人唔舒服嘅，但你要明白唔係得你一個人嘅。做好準備，保持自信，咁就可以好專業咁解答你係空窗期期間學咗啲咩有用嘅技能啦。
💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/3929/CV%E7%A9%BA%E7%AA%97%E6%9C%9F%E5%B9%BE%E8%80%90%E5%85%88%E6%9C%83%E9%9F%BF%E8%B5%B7%E8%AD%A6%E8%99%9F%EF%BC%9F%E8%81%B7%E5%A0%B4%E5%B0%88%E5%AE%B6%E8%A9%B1%E4%BD%A0%E7%9F%A5.html