俾個客激親？怒火中燒如何平復情緒工作？

打工仔日日都要處理啲麻煩客，又要湊老細，又要趕proposal，啲job仲要多到OT 24個鐘都做唔曬，要keep住好脾氣真係唔係咁容易，EQ低啲都唔掂！咁俾同事、客人激完，應該點平復返心情、幫助自己快速投入返工作呢？
化怒火為食量
食嘢絕對係抒發情緒嘅一大好方法！俾人激親、道火仲燒緊？即刻開返包薯片嚟食，薯片聲夠曬治癒不但止，放肆食嘢個感覺仲夠曬爽！食完嘢再飲返杯下火涼茶，包你心情好返好多，可以繼續投入工作！公司pantry以後要入多幾箱零食先得喇！唔係日日啲同事做到扯曬火，搵嘢食嚟發洩，20包薯片都唔夠分啊！

行開洗個面
無論係做嘢做得太攰，定係俾人激嬲、成個人變得好唔冷靜，大家都會勸你去洗個面，其實都不無道理，你個人咁燥底，血壓飆高，係需要用凍水洗個面、降吓溫嘅。而且，洗個面等自己頭腦清晰啲，諗嘢或者都會唔同啲呢！話唔定洗完面之後，你就發覺其實冇咩嘢需要/值得嬲！

將工作重新排序
做嘢做到火遮眼，之後做咩都唔會做得好架喇！等自己冷靜落嚟之後，將工作重新排序，先做一啲比較容易，或是做落你會比較開心和享受嘅工作，之後先再處理返啲麻煩嘢，實行眼不見為乾淨，先將問題放埋一、二邊，做好其他輕鬆啲嘅工作，等自己有完成工作嘅成就感和滿足感，最後先再跟手返啲難題，相信你嘅心態和心情都會唔同咗架喇！
將負面情緒寫出來
大家一有咩喜怒哀樂，都會習慣同其他人分享，但俾人激親、怒火心裡燒呢啲咁負面嘅情緒，都係唔好發洩喺人哋身上喇！影響埋對方就唔好啦！想抒發嘅話，不妨試吓將你嘅不滿寫出嚟，當係status咁打篇千字文，寫完就好似講曬出嚟咁，舒服曬！前提係唔好俾涉事人睇到你篇發洩文啊！唔係就水洗都唔清架喇！

反思自己
最老套、亦都係最重要嘅事，就係自我反省：究竟係咩原因導致你咁勞氣？你自己又有冇做得唔夠好嘅地方呢？諗深一層之後，你就會發現其實冇嘢需要嬲，甚至乎自己都有不足，識話人唔識話自己，對人哋都唔公平啊！不過，我唔係叫你要嬲埋自己一份啊！只係搵出解決問題嘅方法，總比你坐喺度一個人生悶氣更有用啊！

我都明打工仔每日都遇到好多激心激氣嘅事，但嬲還嬲，咪又係要繼續搵食！快速平復心情投入工作好過啦！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/3243/%E4%BF%BE%E5%80%8B%E5%AE%A2%E6%BF%80%E8%A6%AA%EF%BC%9F%E6%80%92%E7%81%AB%E4%B8%AD%E7%87%92%E5%A6%82%E4%BD%95%E5%B9%B3%E5%BE%A9%E6%83%85%E7%B7%92%E5%B7%A5%E4%BD%9C%EF%BC%9F.html