【聖人都有錯】醒你5招指正上司出錯

老闆都係人，人總會犯錯，無論老細有幾高高在上、幾有架勢，有時都會唔小心做錯決定。依家醒你5招，上司見你勇敢指出佢嘅錯誤，咁幫得公司手，分分鐘會升你職加人工！
1. 把握發表意見的機會
上司講完一大輪嘢之後，通常都會循例問吓大家有咩意見，呢個時候，就係你表現嘅好機會：唔洗直接同個上司講係佢唔啱，你只需要當係自己嘅個人意見咁，稍為作出補充，等上司自己揣摩和反思，佢覺得你講得合理，自然會buy你嘅idea，欣賞你嘅能力，你又可以間接改正上司嘅錯誤，又唔洗驚會落佢面，一舉三得啊！

2. 先認同後指正
以前中學考英文小組討論都有教，唔理對方講咗啲咩，乜都答咗句「I agree with you」先，然後再「but……」，估唔到呢套對答方法，喺職場一樣用得着：唔理老細套理論幾錯都好，乜都認同咗先，再用疑問句表達你的見解，例如「如果咁咁咁會唔會好啲？」、「但係咁咁咁會唔會更加好？」，用問題嘅形式指正上司嘅錯誤，等佢自己考慮清楚，自然可以避免尷尬，又唔會令老細丟面啦！
3. 單獨跟上司講
如果用間接或疑問句嘅方法，老細都聽唔明嘅話，咁就只可以私下同老細傾，不過記得都要低聲下氣啲，始終老闆都唔鍾意畀下屬教返自己做嘢，但依家社會開明咗咁多，老闆見你敢於指出佢嘅過錯，反而會樂意聽從，讚你都嚟唔切，加上依家唔係咁多人有勇氣逆老細意思，你有呢份膽識，老細對你可能會更加刮目相看。

4. 幫上司搵好下臺階
雖然依家唔少上司都好好相處，對於畀下屬指正失誤都唔會太介意，但點講都係瘀事一件，所以提醒上司前，最好先為上司搵好下臺階，例如「係因為我無事先同你講」、「因為對方未覆我哋」等等，總之就盡量將個波推畀自己或其他人，等上司知道自己錯喺邊，又覺得錯不在自己。願意為保上司面子搲爛自己塊面，點都要頒返個「最偉大員工獎」畀你啦！

5. 先糾正再報告
如果你知道上司所畀嘅指示係唔啱，而上司又唔得閒show你，點算好？有一個大膽啲嘅方法，就係先斬後奏，按你認為啱嘅方式去做，做好咗先再同上司匯報，咁一嚟又唔會浪費時間，二嚟又可以做返啱樣嘢，上司可能會讚返你轉頭，覺得你辦事能力高，又有主見！仲分分鐘連自己犯咗錯都唔知添！不過，呢個係一個比較冒險嘅辦法，只適用於十萬火急，老細落錯order，而份文件又urgent嘅時候。如果你都係唔sure嘅話，勸你都係知會返上司穩陣啲喇！
上司出錯，分分鐘會影響成間公司嘅命運。所以，作為公司嘅一份子，上司有錯點可以唔出嚟指正佢呢？其實只要用啱方法，指正上司嘅過失都唔係好難啫！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/2976/%E2%80%8B%E3%80%90%E8%81%96%E4%BA%BA%E9%83%BD%E6%9C%89%E9%8C%AF%E3%80%91%E9%86%92%E4%BD%A05%E6%8B%9B%E6%8C%87%E6%AD%A3%E4%B8%8A%E5%8F%B8%E5%87%BA%E9%8C%AF.html