想轉工應以什麼標準搵新工？

好多打工仔都想趁住新年前後，轉換吓工作環境，當係一個畀自己重新出發的機會，但搵工係咪高人工、福利好，就為之係一份筍工呢？其實凡事都要case by case嘅，始終一份適合自己、能滿足你的期望嘅工，總好過一份高人工但冇得發揮嘅工架嘛！以下就有幾個標準畀大家，俾各位搵工時參考吓！
1. 薪水
做人呢，就總要有啲上進心嘅，何況依家生活艱難，有得搵梗係搵份高人工嘅工啦！唔係話一定要貪心啲，喺expected salary嗰欄度有幾高寫咁高，只係打咗咁多年工，累積咗咁多年經驗，薪水點都要一份工高過一份工，至對得住自己啦！你話係唔係喇？

2. 發揮機會
咁辛苦搞掂個大project，雖然好攰，但做完都會覺得好滿足，始終係自己一手一腳完成嘅事。所以，在工作上能否發揮所長，對打工仔嚟講係好重要嘅元素，來決定你想唔想繼續留在該公司工作。有位畀你發揮，自然就會搵到你嘅價值所在；相反，如果份工只係要你每日打吓文件、幫手影吓印，咁份工唔做都罷，做完都唔會覺得高興。

3. 擅長項目
搵工最好都係根據自己的專業比較好，話曬自己擅長，做起上嚟都易啲上手。雖然有啲人會話想轉吓工作類型，唔想畀同一種工種限死自己，唔係話唔得，嘗試吓不同新事物固然係好事，只係你可能會浪費咗好多時間在適應和學習上面，加上都冇乜公司會想請個冇相關經驗嘅人返嚟，就算肯請，你都可能會因為冇相關背景而落後其他同事，咁做乜又要攞苦嚟辛呢？
4. 工作環境/文化
有機會去interview時，不妨探聽吓該公司的工作文化，觀察吓人哋點做嘢。如果間office個個人都係懶懶閒、唔做嘢，同HR contact時對方成日都笠笠亂、咩都唔清楚咁，咁怕且間公司都唔多好做；但如果你見到啲同事都係好認真工作，HR又有交帶，公司環境又企理，咁第時如果真係入去做，應該都唔會差得去邊。

5. 公司能否滿足你的期願
除了工作上的目標，人生上的目標，如果公司都能夠盡量配合的話，咁就perfect喇！例如你嚟緊諗住去working holiday，或者打算結婚、生小朋友，而公司不但願意配合你的計劃，可能改同你簽短期合約，等你工作更有彈性，或是調動你的上班時間，等你有多啲時間陪屋企人，更會鼓勵你的話，咁佢一定係一間好公司。不過，就算公司未必可以100%遷就你，但都肯與同事多溝通，上下都相處融洽，咁應該都唔錯！

搵工前，建議大家先寫低自己對新工有咩目標和期望，然後再好似寫check list咁睇吓邊間公司最能滿足到你，希望以上5個參考標準可以幫到你啦！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com
文章來源:https://www.ecjobsonline.com/news/2765/%E6%83%B3%E8%BD%89%E5%B7%A5%E6%87%89%E4%BB%A5%E4%BB%80%E9%BA%BC%E6%A8%99%E6%BA%96%E6%90%B5%E6%96%B0%E5%B7%A5%EF%BC%9F.html