擦鞋仔的5個特徵

每間公司總有一個擦鞋仔，平時唔聲唔聲，一見到老闆就四萬咁口，氹到老闆鬼咁開心。呢種人仲要一直潛伏喺同事中間，等你注意唔到佢，等老闆嚟到先至出擊，不知幾咁有機心！不過，要搵出你身邊嘅擦鞋仔，一啲都唔難啊！皆因佢地都有一啲共同的特徵！
1. 無敵變面王
擦鞋仔其中一個比京劇大師都仲要厲害的本領，就係變面！平時對住啲同事就黑口黑面，但一sense到老闆嘅氣息，就即刻180度大轉變！一秒內E起排牙歡迎老細、狂打招呼，展現佢對上班的熱情，務求喺老闆心目中建立一個好員工的印象。

2. 老闆2.0
一個稱職的擦鞋仔，係從來都唔會提出自己嘅意見，只會奉承同跟隨老闆的意思行事。被問到該如何完成某工作，佢地都只會傳述老闆的order，成隻應聲蟲咁，唔講仲以為有個複製老闆喺隔離。

3. 大獻殷勤
講到明要討好老細，點可以缺少服侍老闆、隨傳隨到呢一環呢 ? 每日買咖啡、買下午茶比老細已經係基本，幫老細排隊買限量版模型比佢個仔、落雨遮老細去停車場、老闆出trip幫佢照顧佢屋企缸魚等等先係分高下嘅招數。
4. 跟得「夫人」
老闆去到邊，擦鞋仔就跟到邊。因為佢要時刻奉承老闆、討好老闆，等老細注意到佢嘅存在，繼而先有被賞識、被看重的機會。擦鞋仔嘅跟得指數，分分鐘仲高過老細嘅司機、保鑣同貼身袐書啊！

5. 篤同事背脊
想上位？就梗係要踩低其他人搏老闆歡心！邊位同事唔小心做錯野、遲到，擦鞋仔都會一一彙報比老闆知道，一啲同理心都冇！難怪會成為一眾同事嘅公敵！

唔想比擦鞋仔有機可乘、報串比老闆知道你遲到、番工偷偷地同人whatsapp傾計、淘寶，勸你都係及早認清你身邊嘅擦鞋仔好啲！唔係陣間比人炒左都唔知咩事啊！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/2678/%E6%93%A6%E9%9E%8B%E4%BB%94%E7%9A%845%E5%80%8B%E7%89%B9%E5%BE%B5.html