世界仔vs擦鞋仔

世界仔同擦鞋仔都可以喺辦公室立足到，但啲人對呢兩類人都有截然不同嘅反應。兩者之間有咩唔同？
1. 表現真誠與否
世界仔夠真誠；擦鞋仔太假意。雖然都會做奉承人嘅行為，但世界仔唔會太浮誇，將對方捧到天上有地下無，然後轉個頭喺背後數對方不是。佢地通常會喺對方真係做到一件好事時當面或者事後表揚、答謝對方，唔會話一直等時機係咁擦鞋。相反，擦鞋仔為咗著數，明明唔想讚人，都掩住良心，分分秒秒講到勁誇張咁。當對方再冇利用價值時，擦鞋仔就唔會再理嗰個人。做人最梗要夠真，呢方面世界仔勝！

2. 懂人情世故與否
世界仔識撈得嚟唔會得罪人；擦鞋仔分分秒秒都得罪緊人。世界仔都係一班重視人際關係嘅人，佢地會幫助身邊嘅人，唔會因爲對方冇利用價值而無視人。識睇人眉頭眼額嘅佢地見到對方咩表情反應，就會用相應方法同佢相處。舉個例子，做好一個project會同時向同事上司表達謝意，而唔係只擦未有落力做嘅上司鞋。但擦鞋仔一味巴結人，見人哋冇利用價值就即刻當人透明。難怪世界仔又贏！
3. 人脈廣與否
世界仔人脈廣，人緣好；擦鞋仔有人脈，但唔代表廣同人緣好。人脈廣唔係只識得多人就得，仲要係識到可以幫到自己嘅人。面面俱圓嘅世界仔對人真心，處事又得體成熟，令佢地喺職場上廣結良緣。同事鍾意同佢哋相處，上司肯俾機會佢哋，客戶願意同佢哋聯絡。到世界仔有難時，呢班人就會現身扶世界仔一把。至於擦鞋仔，平時份人咁假又得罪人多，即使識到好多人，當中又有幾多個會想幫佢呢？

4. 有實力與否
最重要嘅一點：世界仔有實力；擦鞋仔冇實力。上到位又得人心，當然係有翻咁上下能力先做到。面對每一個工作項目，世界仔都會盡力做好。佢哋亦會努力增值自己，喺有人際關網絡嘅同時用行動證明俾大家睇「我係掂嘅」。不過擦鞋仔就只靠旁門左道，擦鞋上位。

咁樣比一比，高下立見！所以想雙贏—贏事業，贏民心，就要學世界仔喇！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/2539/%E4%B8%96%E7%95%8C%E4%BB%94vs%E6%93%A6%E9%9E%8B%E4%BB%94.html