面試前要好印象 履歷表求職信不可少

有咩人會俾人「未見官先打八十大板」？咪就係求職信同履歷表寫唔好嘅人囉！搵工都唔寫好啲，係人梗係想打發你走啦！唔想工都未見就輸比人，就要喺求職信同履歷表下啲功夫喇！
求職信 Cover Letter
先講同履歷表同樣重要，但到今時今日仍然有唔少人忽視嘅求職信。求職信俾左一個同公司文字上交談嘅機會你。當你send E-mail求職時，點都唔會只係得份履歷表嘅word檔，然後喺電郵內文打句「hi! bye!」就算啩？

1. 展示熱誠及能力
想人哋請你一定要俾人睇到你對嗰份工作嘅熱誠同自己有能力勝任。齋打一句「本人對此職位深感興趣，並自覺有能力勝任。」係唔夠，了解公司背景，講公司有咩吸引想入去做，加分！至於講自己勝任到，不妨用兩至三個相關工作經驗，重點講下自己有咩做左，咁就夠曬具體。

2. 用字要謙卑
最講技巧同最重要嘅一定係措辭用字。一面介紹自己之前嘅工作經驗同威水史嘅同時，要俾人覺得你係一個有實力，但同時唔囂張、易相處、易合作嘅人的確唔容易。但為左令公司對你默默加印象分，點都要識寫啦！
舉個例子，喺之前工作嘅公司以活動總監身份籌備咗一項公開大型活動，成功吸引成千人熱烈參加。咁喺履歷信介紹呢個經驗，講咗之前嘅職級後，加翻句「帶領數十名下屬同事合力籌備」，當中嘅「帶領」已經展示咗你職級上嘅領導能力，之後加翻「合力」兩隻字，又令人覺得你有合作能力又唔擺架子。

履歷表 Resume/ CV
1. 自我介紹
唔少人只係喺CV到以點列方式打個人資料、工作經驗、技能等，但其實喺個人資料前加一小段介紹自己嘅欄目都得㗎。自我介紹可以講自己性格、專長，再加為公司帶到咩貢獻等等。字數六十字內就最好。

2. 精簡經驗
揀選同應徵職位相關嘅工作經驗係常識吧！無理由見文員同人講自己做過補習咁扯唔埋。諗好有咩相關經驗，講下份工嘅主要工作內容，等人地對你做過咩多翻少少認識。有時可能因為見你有相關經驗會加分都唔定！

根據以上要點，再運用你嘅小宇宙寫好求職信同履歷啦！祝搵工成功！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com
文章來源:
https://www.ecjobsonline.com/news/2344/%E9%9D%A2%E8%A9%A6%E5%89%8D%E8%A6%81%E5%A5%BD%E5%8D%B0%E8%B1%A1--%E5%B1%A5%E6%AD%B7%E8%A1%A8%E6%B1%82%E8%81%B7%E4%BF%A1%E4%B8%8D%E5%8F%AF%E5%B0%91.html