誰人畢業不迷茫

或者都有好多人，其實都唔能夠叫迷茫，特別是帶有專業的科目，醫生丶律師丶工程師丶會計師，讀邊泛，就做番邊行，有時係唔洗點用腦，更加無唔知搵咩工的憂慮，最多都係揀入邊一間big four，做邊間firm，係邊間醫院等等。當然，都仲有一大班文學院丶社科學院出黎的同學，同埋一啲唔想咁早被定型丶搵下自己人生方向的人，係身處係一片迷霧當中，睇唔清楚前面係點。
對香港學生黎講，有時最恐怖嘅其實唔係搵唔到工，又或者你想做嘅野好難實現。反而係當夜閑人靜，你墊高枕頭為前路打算時，你竟然唔知自己有咩係真心想做，值得付出心力時間去拼搏。見到人地好清楚想要咩，可能係搵好多錢，可能係創業，可能係做機師，你先係最羨慕，佢地有咁嘅勇氣去將付諸實行。

我諗青春莫過於此。揮霍丶不理後果丶想做就做。

總覺得香港學生（其實姐係我自己）視野狹窄之餘，就只係識羨慕人丶羨慕其他國家的學生。點解人發夢我發夢，人地總好似找得著夢境與現實的交叉點，而自己除左小下香港教育制度，就彷彿繼續沒有靈魂的生活，日復一復，直到捱到生活安穩的時候，才來覺得遺憾。

我沒有勇氣，或者係因為身邊的同學有著落時，你會為仍然上緊JobsDB嘅自己感到焦急，你甚至覺得自己太廢，先繼續無著落，就好似一個舞會入面，坐在一邊完全無人理嘅女仔，對自己身材樣貌可以有幾大自信。實際啲嘅考慮，你接受唔到自己無一份正職，又無穩定嘅收入。黃修平話自己十年都無做過正職，但一直堅持自己熱愛的事，先叫做好似有啲成績，咁香港有幾多個黃修平？早個月睇到篇新聞，一個曾經畫過港漫的漫畫家，失業六年，鬱鬱不得志，就係屋企跳左落黎，好殘酷，但我感到香港的一種真實。六年無野做，空有一身好武功，試問邊個會頂得順。
所以講到尾，迷茫，話係一種代價多過一種情緒，可能更貼切。迷茫裡面，會有好多懷疑同否定，好多聲音叫你咪L發夢，安份守己打份工。打工仔，一年去番一兩次旅行平衡心理，醒目嘅或者做三五年有得升，等個市一冧，話唔定仲上到車，有餘錢過品味生活，扮下偽中產。諗諗下，其實唔錯。

黃修平？香港係有，但難啲係你。

誰人畢業想迷茫。

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/1459/%E8%AA%B0%E4%BA%BA%E7%95%A2%E6%A5%AD%E4%B8%8D%E8%BF%B7%E8%8C%AB.html