歐聯賽果對上市球會股價影響

顯示分享連結
祖雲達斯喺歐聯八強爆冷出局之後一日，股價喺歐洲股市開市後迅速下滑，跌幅一度達至 22% 而要短暫停牌。一場歐聯勝負，竟然令投資者有咁大反應?

當地時間4月16日晚上演嘅兩場歐聯八強次回合賽事，對賽四支球隊中，除咗巴塞之外，另外有三隊都喺唔同嘅市場掛牌上市。今次筆者從十六強第一輪首回合賽事進行嘅嗰個禮拜(2月11日)開始，同大家睇吓呢三隊嘅股價走勢，睇下勝負對股價嘅影響。


祖雲達斯喺 2月20日十六強首回合作客 0:2 輸俾馬體會之後，股價喺之後一日即刻由之前一日收市價 €1.449 跌到 €1.288 (-11%)，直至次回合之前，股價一直都喺大約 €1.20-€1.30 嘅範圍徘徊，但喺 3月12日次回合主場反勝 3:0 晉級之後，下一日收市時旋即反彈返上 €1.436 較接近首回合前嘅水平。十六強賽事之後，祖雲達斯股價展開升浪，即使 4月10日八強首回合作客同阿積士打和1:1之後，都無阻股價上升，到咗4月15 日，更加升穿 €1.70 水平，但係去到 4月17日祖雲達斯出局後，一開市就跌到 €1.319, 即使去到收市，都只能夠上返 €1.39, 比前一日跌咗 17.6%.


至於阿積士，十六強次回合(3月5日)作客贏咗皇馬之後，第二日股價由 €15.35 單日上升 7.8% 去到 €16.55, 之後大約一個月慢慢升到 €17.00 水平，八強首回合賽果似乎對股價表現無大影響，去到次回合淘汰祖雲達斯，第二日股價單日升咗 9%, 上到 €18.70, 仲破埋 52週最高收市價。


似乎呢兩隊近期嘅股價表現都同各自歐聯嘅成績有好大關連。至於曼聯，舊年 12月18日美股開市前宣布摩連奴離任後, 股價由上一日US$17.30 升到 US$18.30. 一日後宣布蘇斯克查出任看守領隊，股價再進一步升至 US$18.94, 兩日累計升咗 9.5%. 到咗二月中歐聯十六強前夕，股價逐漸上到大約 US$19.50 水平。十六強首回合輸俾巴黎聖日耳門後，股價單日跌咗3.4%, 但大家要留意同一日曼聯公佈咗 18/19 年度嘅半年業績，可能亦有多少影響。

一星期後，曼聯宣布萬豪酒店集團成為官方伙伴，帶動股價短暫突破 US$21 關口。反而 3月7日曼聯次回合反勝，或者3月尾宣布蘇斯克查擔正，甚至八強兩回合輸俾巴塞，股價都冇特別明顯嘅波幅。除咗似乎又再一次印證活華特所講，曼聯商業表現同球隊戰績無太大關連之外，某程度上可能都反映咗普遍投資者對曼聯喺歐聯成績嘅期望。

祖雲達斯季初簽入C朗之後，股價曾經喺一個月之間升咗接近一倍，反映咗投資者憧憬C朗可以為祖記帶來嘅商業收益，與及提升球隊實力角逐歐聯。如今八強爆冷出局，股價亦隨即下滑。

相反, 17/18 球季總營業額不足一億歐羅嘅阿積士 (甚至不及祖雲達斯嘅1/5)，接連淘汰皇馬同祖記兩大班霸，肯定可以為 18/19 球季帶嚟可觀嘅收入，股價自然爆升。

當然，股價波動會受唔同嘅內在與及外圍因素影響。祖記股東唯有寄望今次只係短暫嘅技術性調整!

如果喜歡我們的文章，請即分享到︰

標籤: 祖雲達斯  阿積士  曼聯  歐聯