「等埋！我落黎陪你踢波。」

「既然個教育制度咁有問題，點解要讀書？」
「唔讀書，以後搵唔到工。」
「waiter,sales,廚房佬,看更,倉務物流……唔係工黎？」
「冇前途。」
「點解要你地大人去界定何為有前途，何為有出息？」
「總之你要讀好書。」
「個制度已經錯Q曬，外國根本唔會逼細路仔過呢d生活。」
「以前我地冇書讀，擔擔抬抬，落田耕種，邊有你地咁幸福？」「你地眼中既幸福，唔代表我地眼中既幸福。我寧願記多球星既英文名，都唔想不停做試卷；我寧願落街踢多幾場波，都唔想去補習呀。」

16歲既我，雖然冇勇氣講出呢番說話，但我用自己行動抗議眼前做都做唔曬既試題同練習題，我約埋隔離鄰居個個阿強，一齊跑落街踢波。

因為我知道，如果我唔落球場踢波，我就準備落墳場踢波。走上天台跳落去，好多人都諗過，有人硬住頭皮跳咗落去，有人臨陣退縮返咗屋企，有人甚至連行上天台既念頭打消咗。我唔願意去評論對與錯，而我的確冇勇氣去死，當然我知道，喺呢個荒謬社會，講道理係冇用，每個人面對既困難都係不為外人所知。我唯一可以做既，就係同我屋企既小朋友講，遇到唔開心既野記得同我講，讀書唔掂根本冇所謂。

好似我個妹咁9歲讀小學四年班，功課多到嘔，唔補習根本做唔曬。有時候佢走黎問我功課，我一睇都覺得係難咗d，英文每個禮拜記咁多單詞，中文字詞句又係咁多，數學公式又要記，頭先我見到個妹仲記緊「明喻」同「暗喻」既分別，真係覺得佢讀書犧牲咗佢太多野，近幾年我未見過佢星期六日係唔使掂功課。
把握到時機，我就同我個妹講，萬一讀唔到書，我會養佢直至佢嫁人。唔使擔心讀唔到書，盡咗力就ok，學校如果有人蝦佢記得同我講。

衰d講句，我唔想有日兩兄妹要陰陽相隔咁慘情。

有時候喺球場度見到d小朋友踢得唔好，我都走去搭下佢膊頭，傾下計。

細路最需要既係人地陪伴同關心，而唔係你俾幾多錢佢買幾多野。

從舊年年尾開始，我鐘意落樓下同d細路踢波，聽到佢地叫我亞臣，我覺得好親切。

「喂，你地唔開心都唔好做傻事wor。」

「知啦。」

[喜歡我的文章又不想錯過的朋友，可以在專頁右上角Liked/已讚好,按下Get Notifications/接收通知。]

https://www.facebook.com/footballtellhistory/

點解我ICON手字咁靚？多謝練黑文龍先，佢係一個全職寫字人黎咖！！！
如果想睇佢其他作品或者搵佢幫手設計字體，歡迎like：

https://www.facebook.com/dark.calligrapher/?fref=ts