【起底組】前 Candy Crush 高層加入阿仙奴團隊？！

阿仙奴新主帥艾馬利已經全面展開新球季備戰工作，正所謂新人事新作風，艾馬利上任後雖然尊重球會幕後老臣子，有副主帥保特等前任班底留低，但當然少不免帶嚟自己嘅幕後團隊，名宿列文、門將教練 Gerry Peyton、老臣子 Neil Banfield 、 Boro Primorac 及軍醫 Colin Lewin 等人不獲續聘。艾馬利除咗帶嚟拍檔Juan Carlos Carcedo出任聯合副主教練之外，亦從外部招募新成員，今次主角就係新任Data Scientist —— Mikhail Zhilkin 。
俄羅斯人 Mikhail Zhilkin 對於球迷嚟講係陌生人，但你可能已經接觸過佢而不自知，因為佢正係著名電子遊戲 Candy Crush 嘅核心成員之一，而家竟然踩入足球界，而且入行第一份工就係阿仙奴？


原來 Mikhail Zhilkin 大有來頭，佢喺有「俄羅斯MIT」之稱嘅莫斯科物理技術學院 (Moscow Institute of Physics and Technology) 取得應用物理及數學碩士學位，絕非泛泛之輩。進修期間及畢業後，佢喺唔同機構任職過工程師至團隊經理職位，專長係數據分析及管理，精通俄語及英語。

直至2013年，佢去到瑞典，加入 Candy Crush 嘅開發團隊，Candy Crush 已經喺2012推出第一個版本，2013年正值起步發展關鍵時期。 Mikhail Zhilkin 喺團隊擔任 "Senior Data Scientist / Tech Lead" 職位，佢喺網上簡歷上稱自己曾監督旗下兩大作 Candy Crush Soda 及 Candy Crush Jelly 嘅開發及發行工作。佢亦喺2017年成為 ZX Games 聯合創辦人。


根據 Mikhail Zhilkin 喺 LinkedIn 上嘅自述，佢嘅專長係大數據、資料視覺化、自動化技術及機器學習。雖然呢份係佢喺足球界第一份工作，佢嘅背景睇落風馬牛不相及，但球迷可以放心，因為球會層面內其實有唔少工作都係由「外行人」負責，例如好多球會嘅管理層都係商界背景。喺艾馬利重視細節嘅執教風格之下，科技勢必係重要一環， Data Scientist 一職由 Mikhail Zhilkin 呢位專家擔任，應該係一個好選擇，佢將會負責透過數據分析球員狀態、表現、避免傷患方面嘅問題。

Source: football.london、LinkedIn