5個由「有」變「無」的女藝人

電視節目有好多種, 但唔係個個節目都啱宅男收睇嘅! 尤其是一台獨大, 恃住人強馬壯同慣性收視, 過往都唔多吼收費台嘅同行, 不過隨著新電視台同新免費牌出現, 加上內地大量招攬港星北上, 壁壘分明的局面漸被打破, 近年多了幾個由「有線」變成「無線」的女藝人, 不過星途就真係各有際遇一言難盡。

黃翠如
最成功例子一定係脆魚BB, 在「有台」打滾多年, 不停做旅遊節目, 賺到嘅主要係機票同食宿, 同埋寫吓旅遊書賺外快....
不過泊著好碼頭, 余詠姍拉佢過檔仲欽點力捧, 年近三張而且演出經驗接近零(拍過一部「有台」出資電影)嘅旅遊主持, 即時就變身為劇接劇, 廣告接廣告, function接function嘅當紅花旦。十A狀元+劍橋+港姐冠軍? 這些機會不是屬於妳的....
李佳芯
硬照model出身, 朋友介紹入咗「有台」, 都係做吓旅遊節目, 吹水節目, 形象相當討好(但只係對男觀眾), 佢做嘅旅遊節目, 真係幾自然幾清新, 配合優美嘅景色, 真係帶俾觀眾一種好true好pure嘅感覺, 不過大台而家嘅旅遊節目, 主要係女主持包住白毛巾浸溫泉然後著三點式扮游水或者彈吓彈吓, 身材平平無奇嘅Ali當然無佢份, 而家唔係嘈喧巴閉幾隻是非精, 就係做奸妃狐狸精壞女人, 改名真係可以改變一個人!

譚凱琪
同樣係拍咗百幾集旅遊節目之後, Zoie睇見翠如BB咁好發展, 都想跟返行同一條路, 可惜命水嘅嘢, 人哋就泊住好碼頭, 佢就同人唔同命, 大家姐係廣告模特兒, 大姐夫係藝人, 二家姐係新聞主播, 加埋師父小室哲哉, 全部對星途都沒大幫助, 真正貴人反而係三、四線藝人戴耀明(正確應該係「小戴耀明」).... 十年窗下無人問, 一「舉」成名天下知 !
梁嘉琪
講(跳糟)資歷佢係元祖級, 早於2007年已投敵歸順大台, 講實力佢係演藝畢業受過正統訓練, 但講機會佢就唔及上面幾個師妹, 35歲人扮吱喳妹教人做實驗講正字唔係問題, 但咁多年來最大機會就係《學警 》做到「女三」嘅角色, 人哋脆魚無受訓無經驗無青春, 一過到嚟已經係「女一」, 仲要套套都同做配角甚或大茄嘅嘉琪師姐同台。
龔嘉欣
同涼瓜皮一樣係洪荒時代「有台」女優的龔嘉欣, 星運亦一樣呆滯, 在大台捱足八年先至遇到《愛回家》上位而為人認識, 當然所謂認識都只限師奶同宅男, 唔可同李嘉欣林嘉欣鍾嘉欣相比。其實佢外型真係唔差, 做主持亦算口齒伶俐, 應該值得有更多機會。