[飲飲食食]北京填鴨推介,立即發揮吃貨嘅效率

喺香港拍拖離唔開飲飲食食，而美食天堂嘅美譽造就咗好多林林總總嘅特色餐廳同過江龍登陸香港！所以其實喺香港拍拖只要您同小編一樣都係為食一族，其實一定唔會悶！上星期心血來潮想食北京填鴨，朋友就推介小編到金公館，話啱晒為食但又怕肥膩嘅小編，小編當堂嚇一跳，然後得啖笑，心諗「香港會有唔油嘅北京填鴨？」朋友講到煞有介事咁，於是小編立即發揮吃貨嘅效率，打電話book位去！
餐廳位於個人比較少涉足嘅將軍澳彩明商場，但為咗品嚐北京填鴨，去勻香港18區又如何！話說回來，傍晚晚市時分，餐廳門外相當多人等候，幸好小編有提早預約，否則真係可能有排等！餐廳職員為小編同男友帶位時，沿途經過近乎一半以上嘅食客都叫咗北京填鴨，到底係香港愛北京填鴨嘅朋友多，抑或係好似朋友所言呢間餐廳嘅北京填鴨真係必點嘅推介菜色呢？無論如何，周遭傳來嘅北京填鴨香味霎時間令小編口水直流！等小編馬上去試真啲先！


坐低後小編9秒9翻開menu，毫不遲疑先order個北京填鴨，店員再推介酸菜魚同埋口水雞兩款經典川菜，仲強調餐廳所有菜式都係由正宗四川師傅主理，所以可以多叫幾款小食，試真大厨嘅手勢咁話喎！最後喺店員熱情嘅推介下，小編我哋再追加個夫妻肺片、杏汁白肺湯及四川擔擔麵。

｜北京填鴨｜


半份片皮鴨烤得色澤金黃，賣相相當吸引！原來片皮鴨走健康路線嘅秘密，係在於師傳喺片鴨皮嘅同時，有細心撇走埋鴨皮中間之油脂，所以片皮鴨比一般坊間嘅較為低油脂。拼盤配搭桂花糖、胡麻醬及冰梅醬三款佐醬，為食客帶來3種與別不同嘅味配搭：桂花糖醬比想像中甜度為低，淡淡桂花清香入口令人相當愉悅，至於classic款冰梅醬則較為開胃解膩，而小編個人最愛嘅係胡麻醬，胡麻散發著深焙後嘅醇厚，配上一片鴨肉，風味絕佳！總括而言金公館嘅北京填鴨相當合乎香港人嘅口味，香而不膩！
｜酸菜魚｜


酸菜魚作為是一道經典嘅川菜，個人認為好味嘅關鍵在於魚肉與湯底，酸菜要夠爽口，魚片要夠嫩滑，而這款酸菜魚貫徹餐廳健康風格，入口較為清淡，但勝在魚片夠鮮味，加上酸菜湯㡳味道雖清淡但風味濃厚而不膩，高質！同北京填鴨一樣值得推介俾注重健康嘅朋友仔！

｜其他菜式｜


人生第一次小試牛刀，品嚐夫妻肺片，口感比想像中爽脆；口水雞雞肉嫩滑不算太辣，正宗係一道開胃小菜！至於杏汁白肺湯則相當足料，而且唔算好味精，反而有老火靚湯嘅味道。食到最後，再用一碗四川擔擔麵作結，相當大滿足，擔擔麵嘅湯底略為漿口，證明用料相當濃厚，擔擔麵軟硬度適中，師傳火候掌握得相當好！

整體而言，酸菜魚同埋北京填鴨都係值得推介嘅必點菜式，加上價錢相宜，下次有機會想再試試佢個大閘蟹套餐！