上班下班呢回事 · Week002 日日見都可以好陌生……直至……

上班下班呢回事 · Week002 日日見都可以好陌生……直至……
每朝早同一時間起身，梳洗化裝換衫加加埋埋要成個鐘; 夾啱時間落樓去同一個巴士站排同一條隊等同一號嘅巴士。車站每日企滿晒等車嘅人，差唔多每’日都見，個個都熟口熟面，有啲可能一星期見足五日，連佢哋換咗新衫轉咗新髮型都會留意到，呢種好似好熟但其實又唔認識嘅感覺都幾得意，有時仲會諗好多無無謂謂嘅嘢，又諗會唔會有啲嘢會發生呢。呢啲無無聊聊嘅諗法一直喺每一個相似嘅早上淪迴，直至嗰一日…..

嗰一日係exactly邊日其實我都唔係記得好清楚，我剩係記得嗰日我比平時著得斯文啲，裝化多咗啲，因為一早返到公司就會有個好重要嘅客要見。就係咁，比平時遲咗啲，出門前照一照鏡，「唔，都幾ok。」就急急腳走出門口嘞。嗰日天氣其實麻麻地，天黑黑咁，一面排隊一面心諗唔會咁橋嘅。

滴、滴、滴滴滴滴…… 哎呀，真係落雨tim，死啦，今朝急得滯唔記帶遮，仲要今日著成咁…… 咁係咪要揾地方避雨呢…… 正喺度愁爆之際，咦？我個頭無乜點濕嘅？明明落緊雨𠺝。啊，係排喺我後面嗰位先生，佢靜靜鷄粒聲唔出咁將佢把遮遮前啲啲咁遮埋我。喺嗰一刻我唔係好識反應，佢又無話到明係遮埋我，又無開聲問我使唔使遮埋我，剩係咁隊前咗佢把遮少少遮到我，我自己亦無開聲要佢遮埋我，萬一我出聲佢唔理我，或者佢話無諗住遮埋我，又或者佢以為我想識佢咁我咪好𤓓。呢位先生想點呀！如果你係想遮埋我就好應該大方啲開聲講:「小姐，我遮埋你吖？」呢一刻其實都真係有啲odd。如果係平時我情願自己行開唔使佢遮，但係今日著成咁，我又真係需要有人遮埋自己喎。我無擰轉頭因為我唔知應係點樣打破呢個悶局，只好垂低頭一邊望住佢對白色黑邊嘅波鞋嘅鞋頭一邊等……
時間好似變得好慢…… 好彩就喺呢嗰時候有車到，跟住隊等上車，我行快少少，佢把遮仍然跟得好貼無離開過我……就喺我哋上咗車嗰一刹那……

「咁……好啦……唔該。」

我講呢句「唔該」嗰陣我仍然無擰返轉頭，只係瞄一瞄佢，講完我就急急腳走上樓上。佢無跟埋上嚟。我坐定定諗返呢個戴黑框眼鏡著白色恤衫黑色西褲襯波鞋嘅男仔，宅得嚟都幾好心地幾得意，唔聲唔聲遮人其實都幾體貼幾有型。心入面不停諗佢點解要遮我？點解又唔出聲？之前有無見過？佢會唔會留意咗我好耐呢？如果聽日又撞見咁應該點好呢⋯⋯