上班下班呢回事 · Week008 贏咗定輸咗？
上班下班呢回事 · Week008 贏咗定輸咗？
「你點睇觀塘，係咪搞精品房？」講緊嘢嘅呢個就係我阿姐 – Barbra
「都可以……不過，依家好多人跟住做緊……」我停一停，望一望佢……
「繼續。」
「呢排興初創，興slash，好多年輕人想自己出嚟創業，又或者想做自由職業者。不過起首都無乜資源，又無乜關係，又唔知點去揾人幫手……」
「Co-working space。」我都話我阿姐醒㗎啦。
「無錯，搞個common business centre俾多啲Hi-tech 設施，開會設施，搞seminar設施都可以。再配合一啲住得下人嘅寫字樓配套……」
「做到成個co-working hostel咁。」
「唔……」我一邊點頭一邊回應……
「夠創意，咁現樓改建定拆咗佢從新起過？」
「改建，不過老總對呢個盤未必齋睇回報……」
「搞重建做寫字樓咁大路嘅嘢，我哋同team A比未必有太大嘅優勢，就算buy我哋都未必輪到我哋搞……只可以recommend搞改建……老總當呢個盤係旗艦盤，多數想大搞啦……睇嚟注定嬴idea輸project……到時再睇下老總點決定先啦。」佢嘅分析好有logic，一啲都無偏離事實，同時，完全睇得出佢嘅量度同智慧。呢個阿姐唔簡單。
「盡快約老總傾，要好好睇睇，你明點做啦。」
「明白。」我知佢明知個結局都想攞番個頭彩，佢亦都知老總會點決定同埋老總會點睇佢。佢好叻，表面上好似喺下風，但其實佢幫老總舖咗條好靚嘅紅地顫，順咗佢意; 呢條紅地顫將來Barbra自己會用得番。
方向定咗，做嘢快好多。要present嘅嘢差唔多搞好晒，唔知佢哋又乜嘢情況呢？我慢慢行去佢個位，見佢好用心咁望住個芒，唔同嘅係今次佢係好專注咁做緊嘢，呢一刻嘅佢，好charm……
「我哋搞掂晒囉喎，你仲搞緊呀？」我用好輕好輕嘅聲問佢。
「咁快搞掂？我仲爭少少。你哋幾時做present？」佢答我嘅時候仍然望住個芒，無望住我。
我輕輕咁向前靠向佢少少，聲線再放輕咗少少 : 「約咗大老板聽日上午。」
「今次你自己上定係你老细上？」
「我無所謂，等老細決定啦。」
「哦。」佢仲係望住個芒……
「咁你哋呢？」
「未定呀，睇老细啦。」
「唔嘿……咁……好啦……唔該。」佢始終無望過我……
我哋來來回回幾句說話，其實我根本好似乜都無講過，乜都聽唔到，呢種情況令我諗起有人講過嘅一啲說話:
「跟他接近得多了，我什麼也聽不到，只聽見自己的心在跳，不知他可有聽到？」
我的確剩係聽到自己嘅心跳聲，咁佢又聽到啲乜呢？
