傷多過踢---Ibrahimovic下季應否留喺米蘭？

Ibrahimovic 近3年前加盟米蘭，打住救世主嘅名號回歸，表現亦係對辦，季中加盟，18場聯賽交出10球，5次助攻，次季19場更攻入15球，2次助攻，可謂前場效率最高嘅球員。今季季初到季中，Ibrahimovic 延續強勢表現，攻入了8球，2次助攻。但佢自9月起，已經總共受傷87日，2日前再次受傷，可能缺席本週嘅比賽。Ibrahimovic 坐擁全隊最高人工700萬歐元，受傷缺陣日數受僅次受重傷嘅Simon Kjaer，到底呢位40歲高齡人士應否繼續留喺米蘭？


== 精神領袖 ==
作為「霸氣」及脾氣暴躁嘅代表，Ibrahimovic 嘅爭勝心絕對有助激勵年輕隊友士氣，逆境波下正正需要佢呢種見慣大場面嘅老將。但並非所有人都頂得順Ibrahimovic嘅性格，就算可能係自己走位有問題，佢都係會對隊友指手畫腳，甚至怒吼，對年輕心火盛嘅球員可能有反效果。加上隊中仍然有Kjaer，Florenzi等等老將，佢哋可能無咁出名，但領導能力絕對不亞於Ibrahimovic。Ibrahimovic唔係米蘭唯一領袖，下季少咗佢，影響其實唔大。


== 表現下滑 ==

雖然Ibrahimovic入球數次算係亮麗，亦有幫手組織進攻(越幫越忙)，但決策力已經大不如前。佢成日交失波，又唔肯回防，經常引致被打反擊。佢入波勁，但同時亦係進攻終結者。Giroud雖然唔善於組織攻勢，但射手觸角有過之而無不及，身體質素，防守意識亦比Ibrahimovic好，比佢更適合正選。


== 多次受傷 ==

Ibrahimovic 已經算球壇老人家了，身體有唔少舊患，亦負荷唔起密集賽程，今季大部分時間都喺到養傷，貢獻唔大。


== 40歲了 ==

Ibrahimovic 40歲啦，米蘭唔可以長期依賴佢，事實上冇咗佢，球隊表現亦無影響甚至更好。米蘭下季會簽入下個當打中鋒，Giroud嘅排序亦比Ibrahimovic 高，睇嚟佢就算留喺米蘭，都只會係第三中鋒。


米蘭已經證明咗，無話無咗邊個唔得，Ibrahimovic 繼續留喺米蘭，上陣機會一定大減，球會亦唔可能高薪續約一個經常受傷嘅球員。我認為，下季分道揚鑣，對米蘭發展更好。