上班族必讀漫畫《島耕作》

細個睇漫畫，鍾情《龍珠》、《男兒當入樽》、《狐忍》呢類熱血王道漫畫，但人到中年，要揀一套啱中佬睇嘅漫畫，一定係《島耕作》。
島耕作系列係由日本漫畫家 弘兼憲史 創作嘅職場漫畫，由1983年開始連載至今，書名一開始為《課長島耕作》，故事描述主角島耕作喺初芝電產（影射Panasonic）做上班族嘅故事。島耕作喺漫畫中由最初一個課長，慢慢晉升，每升一級，書名都會隨住佢嘅職位改變。由一開始嘅《課長島耕作》變成《部長島耕作》、《取締役島耕作》等等，連載超過30年後，升下升下依家已經係公司會長，書名亦都變成《會長島耕作》。

點解咁多上班族會鍾意呢本漫畫？因為島耕作幾乎係每個上班族、甚至每個男人嘅夢想。平民出身不靠父幹、不參與公司派系鬥爭，唔埋堆，但每次工作遇上難題例必逢凶化吉，一路升職加薪成為大公司嘅領導人，而且最重要係，佢係一個靚仔，幾乎去到邊都有女人鍾意 (甚至乎連男人都想搞佢)，兼且十居其九會發生關係，島耕作嘅經歷可以話夢幻過迪士尼童話。

當然撇除主角光環，漫畫仲有形形色色嘅人物，主角身邊都出現好多職場嘅失敗者，如果你係職場打滾過一段日子，一定會喺漫畫入面搵到現實熟悉嘅人物。書入面不時都亦會分享職場生存之道，例如點樣應付你討厭嘅同事或者上司，正如書入面講：

「一旦踏足社會，就不得不跟年紀不同、完全合不來的人打交道。」

「說不定你最不懂應付的那類人，會坐在你旁邊，你也不得不跟那種人合作。」

「這就是社會。」

喜歡文章請讚好
Instagram: https://www.instagram.com/arlikcool/Facebook page: https://www.facebook.com/ahlikcool/