《比宇宙還遠的地方》，咪就係青春囉！

一套好意外睇到嘅動畫。

四個女生去南極，有種好奇幻又亂嚟嘅題材，單單只係接觸到動畫版本第一集嘅我，依舊未了解清楚就已經想追看落去，原因就係佢第一集做得好好睇。

話說我一直等緊封神演義嘅新版，於是開始留意住2018新番，

我睇開嗰個網第一套出嘅就係呢套，見無咩嘢做(難得)咪睇下。

開場係女主角訓到唔知點咁，大槪係咁上下：

佢阿媽就將條濕咗嘅毛巾掩住佢塊臉，由得佢局醒。

之後佢彈起身，好緊張咁到同佢阿媽講：

「我發惡夢比條濕毛巾差啲焗死！」

佢阿媽就好漫不經心繼續執房。

「係咩？」

之後女主角先發現自己身上有條濕毛巾，感覺上唔知幾時同邊個掉係自己身上。
可能就係女主角嘅傻乎乎，同呢一幕表達咗佢同媽媽嘅關係相當有趣，
連帶住之後嘅傻乎乎行為，同兩個女角嘅誇張反應，都令人睇得好舒服。

更重要係佢呢個主題真係幾新鮮，離地得嚟又幾實際去表達青春嘅夢想，
可能另一個女角比較沉重，不過暫時只係輕輕提過佢執著去南極嘅原因，
配合返連自己去東京都唔敢嘅女主角，竟然答應對方會一齊去南極，
呢種咁唔顧前唔顧後嘅想法，咪就係青春囉！
夢想就係一種將「唔顧前唔顧後嘅想法」實現出嚟，
唔洗計算得失成效，唔會考慮市場因素及其可行性，
總之想做就好！

聽落好似好多人都做緊，不過再認真去睇清楚，
實際上好多都只係sale緊夢想去賺錢。
無話啱定錯，只係扭曲咗夢想嘅原意，

亦有好多人會講緊自己有幾努力去圓夢，
其實只係將自己嘅夢想改變，之後就實現咗。

即係好似故事中女主角，去南極為目標，
如果佢未經過努力就突然改變向方，
只係去咗東京一次就叫做實現夢想，
咁就唔該你行開喇~~

雖然我真係唔知呢個故事嘅發展係點，
即係好似之前 咩咩陷阱NTR 我都以為係好睇，
之後先發覺中咗伏~

不過呢套我諗咁清新嘅風格，應該唔會死錯人。但我都預咗唔多人睇，我同香港喜歡動漫嘅大多數人口味都極之唔同~
所以只係想分享下自己發現寶物嘅心情即。

作者本人作品集：
https://ttmmmrc.wordpress.com/
《叛神軍團》(包括免費賞閱部份的付費作品)
《音樂漫遊─ Slow Music》(含視覺小說版本)
《DSE幻想校園》(預計2018年3月出版發售)
《筆示驅魔傳》(含視覺小說版本)
《格子控的執著》(令免費賞閱部份的付費作品)