養一個女朋友，點止四百萬

好多女人嘅最高夢想係嫁個有錢人等人養，以後唔洗做。但你好少會聽到有人話自己最高夢想係養起個老婆，除咗我。
據說，養一個小朋友要洗四百萬。而其實，要養起一個女朋友，佢何止會洗你四百萬。

Joanna係個Office Receptionist，人工爭些少先夠五位數字。而偏偏，佢阿媽要求嘅每月家用係七千。



「其實你媽咪每個月收你同細佬萬幾蚊家用，一個人點用得晒呢吓？」

「算啦，佢以前一個人捱大我哋咁辛苦，老咗梗係想留多個錢傍身嘅，多D安全感嘛。」咁唔怪得我晚晚都訓唔著啦，就係太無安全感……



人工減強迫金再減家用，每個月Joanna可以用嘅錢，係2357……個半。理論上，佢每日是唔可以洗多過80蚊的，而你知道喺香港地根本就無可能生存到，所以佢每個月大部分嘅洗費，都轉嫁咗落我到。
唔講真係唔知，其實我都唔是搵十萬九千七的，只係財政負擔比佢輕鬆，因此順便負擔埋佢嘅負擔。就好似上個月佢感冒菌入耳，左耳暫時性喪失50%聽力，擔心到我死。我堅持帶佢去睇私家專科醫生，睇一次連藥就已經近兩千。



「你想俾Cash定碌卡？」

「Cash得喇唔該。」



佢好鍾意食嘢，晚晚放工我都會同佢周圍試唔同嘅餐廳，而每次食飯，我會自動自覺埋單；電話費係家庭Plan，連同我家中兩位高堂四個人每月20GB；交通費，佢八達通自動增值係用我嘅信用卡；冬天，即係好似開學你會幫小朋友執齊文具書包新書校服一樣，幫女朋友執齊一套（或幾套⋯⋯）羽絨頸巾手套保暖底衫等等是常識吧；見佢每晚同細佬爭電腦煲劇，今年嘅拍拖紀念日，我買咗部iPad送俾佢；換iPhone 6S，亦無理由唔預佢一部；就算只係平平無奇煮個飯仔嘅夜晚，我都會間中送吓花、得意嘅小禮物氹佢。



有人話咁樣同育成港女係無分別，但我反而覺得，幫女朋友埋單其實係一種成就。錫女朋友又點會忍心佢每個月得個雞碎咁多錢可以洗，食唔好、著唔好。見到佢笑，洗咗幾多錢都抵返晒。我嘅人生計劃，最少有一半動力係來自Joanna，我好想努力搵更多更多嘅錢，令佢過更加舒適嘅生活。
有一晚，我睇到Joanna手機有好多張紅葉嘅風景相。佢今年嘅生日，我打算俾個驚喜佢，訂機票去首爾旅行。



「你想俾Cash定碌卡？」

「Cash……唔，都係碌卡啦唔該。」


************************************

網絡作家B612 – Facebook專頁：b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」