過了耳聽愛情的年紀…男朋友實際做過乜對你好？

成日話港女拜金，男人有車有樓揸手先會鍾意，我自己對呢種心態一直都甚為不解。直至到咗行年二十有幾，終於都明白點解女人會咁諗 —— 重點唔係男人而家幾有錢，而係佢肯為咗你去搵幾多錢。
細個嗰陣，或者大家都試過為一個人好瘋狂。呢個人多數無乜錢，對你又唔係特別好，亦未必好專一，但你總會死心塌地咁愛過一次。當時你唔會計較同佢日日食譚仔，去佢屋企瞓上格床過夜，甚至出錢幫佢交埋電話費。咁都毫無怨言，係因為佢講過遲啲會去進修攞返張Cert，又或者去考政府工，諸如此類，總之好快就會有穩定收入，到時就可以有自己嘅屋企、好舒適嘅二人世界，BB豬豬豬豬BB愛死你乜乜物物。

你會毫不保留咁相信，佢今次係遇到真愛，會洗心革面，痛改前非，同你計劃生兒育女，幾時退休環遊世界。

然後，你會發現，一年又一年咁過去，佢仍然只係每個Weekend留喺屋企打機，為咗踢波唔陪你睇醫生，一個月淨係飲酒都洗幾千，每個月仲要偷偷地幫佢增值八達通……有一日，你忽然發覺將來好似仲係好遙遠，好攰好攰，已經無辦法再同佢行落去喇。


原來，愛情唔係得個講字。

知易行難，講永遠都容易過做。就算佢應承你嗰一刻係如何真心真意，到真係要落手去做，佢過唔過到要努力進修、搵工、開OT捱眼瞓嗰關？佢話會對你好好，咁佢捨唔捨得放棄去玩、去Hea嘅時間嚟陪你、氹你？


如果而家再遇到呢種人，就算點樣怦然心動、小鹿亂撞，我估你都會同自己講……「仲細咩！」。過咗耳聽愛情嘅年紀，人長大之後，愛情仲更加要講現實。唔係勢利嗰種現實，而係除咗甜言蜜語之外，究竟仲有咩嘢令你睇到佢對你投放嘅感情。


一個人再如何誓神劈願話愛你，都唔及另一個肯投資時間喺你哋將來嘅人嚟得實實在在。


************************************

Facebook專頁：b612lpp

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」