《去旅行最開心，其實係Plan行程》 — B612

香港人有幾鍾意去旅行，大家都知。對我嚟講，去旅行最開心並唔係飛機著陸去到目的地嗰一刻，而係：plan‧行‧程！
Plan行程嘅樂趣，在於自己買旅遊書、上網睇blog做功課，睇吓呢個地方有咩必去景點，有咩不為人知嘅秘景，同埋一啲無人明你點解咁想去嘅地方，然後將所有呢啲地方，安排一條最順嘅路線，一次過質晒落得嗰三五日嘅時間到。

到正式開始採購，為咗格價，同一時間開住五六個網頁睇價錢，book船、book火車、搶平機票；再靠睇地圖、睇評論，搵間最平最靚景又近嘅酒店；然後記低每個景點嘅開放時間，查定晒搭咩車去……直到大功告成，將每日嘅行程表填滿晒 print出嚟嗰一刻，就係最爽！同拆禮物嘅心情好似，正如一個女仔都係未追到手嗰陣先係最吸引啦。


自己plan嘅行程，可能要搭車搭船再轉搭飛機，然後得十分鐘時間跑去接駁下一種交通工具；可能行程貴到爆晒budget無錢開飯，要捱麵包；可能為咗趕多一個景點，要慳時間瞓火車過夜……但出門旅行，都係為咗創造自己專屬嘅回憶姐，而呢啲人哋睇落去覺得好chur嘅旅程，全部都係自己一手一腳計劃嘅，唔係跟團，唔係跟旅遊書，獨一無二。

然後，終於可以拎住自己plan嘅一疊行程出門旅行歎世界，當然係日日瞓到黃朝百晏唔跟行程，才是正經事啦。哈哈哈哈！

************************************

網絡作家B612 – Facebook專頁：b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」