金秀賢碌齡碌到手腕痛 排31成功晉級

韓國男神金秀賢同男團FT Island成員李洪基繼噚日出席咗喺韓國京畿道水原市舉行嘅「韓國職業保齡球第22期選拔賽」第一日賽事後，今日佢哋繼續第二日賽事，而噚日二人先進行咗15回合賽事，今日就繼續餘下嘅15回賽事，只要平均每一回合超過190分嘅參賽者，就可以晉級參加下周六及下周日舉行嘅復賽，而復賽勝出者就要經過集中訓練，再從中選出合格者先可以成為職業選手。

噚日金秀賢嘅比賽發揮到水準，最終以221平均分成績，於114名參賽者中暫時排名第10，而李洪基就以207.7平均分排第27名。
至於今日嘅賽事，金秀賢似乎有少少失準，今日15個回合佢有208.3平均分，兩日加埋嘅平均分就有214.6分，排名跌落第31位，李洪基今日15個回合平均分係174.3，兩日加埋嘅平均分就有191分，排名跌落第92位，不過二人都可以齊齊晉級。

而金秀賢同李洪基亦因為有共同興趣，兩人喺現場有傾有講，有時打完一回合就會互相提點。而金秀賢喺今日第一輪賽事中連打8局全中紀錄，令現場人士令人驚訝不已。

由於佢哋連續兩日都要參賽，導致金秀賢手腕有啲不適，只見佢喺現場不時要揉捏手腕，而李洪基左右大拇指亦好酸痛，不過都無法阻止佢哋繼續挑戰呢個選拔賽。