細數街場足球術語

香港嘅足球員，相信無一不是由石地街場孕育成長，而踢波有時真係講mood，波友們喺短時間內要湊夠人七打七踢街場真係唔易，但又想踢，唯有去街場跟隊。回想起年少時踢街場，有啲特別嘅術語同規矩，喺道不防同大家回憶一下：

鬥波：指有兩隊人比賽，通常街場冇越位規例。

跟隊：喺石地街場，當你一隊人冇卜場又想踢波，但係又有兩隊人喺場內鬥緊波，而佢哋又冇卜場嘅情況下，你就有權跟隊，意思即係當場內有其中一方入球，你的一隊就可以落場挑戰勝方的一隊，通常以一球定勝負。
自由龍：通常石地街場以七個人為一隊，假如你一隊只得六個人，又揾唔到其他人幫手，你可以經對方同意打少一個人，但任何一位球員入到自己禁區都可以當守門員用手接波，有時會再帶有附帶條件，就係多人的一方要入到對方禁區內才可起腳射門。

九碼：等同於正式比賽嘅十二碼。

死球變生球：小朋友當守門員時通常未有足夠腳力將個波斬上前場，其他球員可幫忙，當龍守門員開死球之前，用腳踢個波俾返守門員，守門員就可以用手接住個波開生球。

射龜：呢個係鬥波輸咗，又或者輪流射九碼射唔入嘅懲罰，被罰者要企喺龍門線上被勝方用波省。

新例：意思係隊友刻意回傳個波俾守門員時，守門員不能用手觸碰個波，相反舊例就可以。

四號波：一般正式比賽係用五號波，因為踢街場場地較細，有人會選擇用較細嘅波。

踢街場好玩之處，在於可以與不同對手較技，甚至結識同配搭一啲唔識嘅隊友，希望呢個文化可以繼續延續落去。