冇奇蹟有實力 : 奇蹟拉麵 MIRAKURU RAMEN

又係時候入大西北，今次一早入去順利完事，十二點未到就過紅橋個邊搵野食。之前都有留意到呢間拉麵，見到食友又寫左兼俾好評，唔使諗今日就試呢間。麵店細細間只有室內8個位，等左一轉就有得坐低。
呢個星期重未有特別口味拉麵，就叫左原味濃拉麵同清湯醬油拉麵。
原味濃拉麵上檯，即刻聞到油脂香同見到一層油脂係湯面十分誘人。
麵條食落都掛湯，口感偏硬但唔會太過份，叉燒肉味不錯又軟熟，加上筍絲鮮甜，呢碗麵已值得專程由市區入黎食。
另一碗既清湯醬油拉麵送上。
麵條叉燒同頭先一樣水準。
呢碗一睇就知係清湯底，因為個湯真係清澈見底，但飲落帶好濃既鰹魚鮮味同醬油香氣，覺得呢個湯底做得比原味更有特色。
另加既紫菜一般，半熟蛋正常，蛋味都夠不過唔算流心。
店家既出品唔雖要奇蹟因為有實力，食完令人想試埋其他出品，遲d出埋限定拉麵更加有理由番轉頭食多一次。

奇蹟拉麵 MIRAKURU RAMEN
地址：屯門新墟青桃徑3號安麗大廈地下15-16號舖