蛋包飯威力 : 日常小館

 
今日過港島東工作，本來想去東大街但怕人多又要等位，兜兜轉轉下去左港島最東既小西灣，試下日式炸豬蛋包飯既威力。
見到小店星期三休息，當日係星期四，心想如果尋日黎就白行一趟。用餐地方唔大，一眼睇曬大約16個位。
餐牌只有兩三版，但以小店黎講都唔算少選擇，不過一早已諗好要食乜，就係蛋包飯跟吉列豬扒配日式咖喱汁。
飲品凍檸茶先上，茶味正常但天氣真係太熱，令到杯野未飲都覺得好似好正咁。
坐多一陣就到吉列豬扒蛋包飯送上，睇落十分對版，日式咖喱汁同想像既差唔多，香辣甜俱備用黎送珍珠米不錯。蛋身軟滑而蛋味不算濃郁，但係跟埋咖喱汁同食就冇問題。
吉豬雖唔算非常厚身，但炸槳上得平均冇一夾就散，咬落又鬆脆有肉味，呢個價錢係收貨有餘。
出品有質素價錢又合理，應該都幾受區內人歡迎，有機會都想搵多幾個人試下其他出品。

日常小館
地址：柴灣小西灣道18號富景商場3號舖
Tel : 6818 3759