重溫味道 : 羅勒印度餐廳

 
多年前在糖廠街商場，食過一餐唔錯既印度菜，雖然印象模糊但大概記得餐廳名字。
前排行過七姊妹道見到呢間，覺得當年應該係食左同名餐廳既另一分店，就坐低希望重溫一下當年既味道。
叫定飲品解辣Lassi一定走唔甩，芒果印度乳酪Mango Lassi幾足料但偏甜一點。
點左兩款主菜既瑪沙拉烤雞及印度咖喱羊肉。
瑪沙拉烤雞既雞肉尚算嫩滑，不過最緊要都係個醬。瑪沙拉醬唔太辣又有一種獨特既口味，且香辣甜既層次都做得幾好。另一個冇相既咖喱羊肉雖然都可以，但真係比瑪沙拉醬比下去。
芝士烤餅比較厚身因中間已放入芝士，烤餅幾香口及食落芝士都有點拉絲效果。
蒜蓉烤餅比芝士烤餅薄身，中間冇夾心但帶淡淡蒜香及食落都幾煙韌。
而家已經少左食咖喱或辣野，不過總會有想食既日子，下次又想刺激下既話應該會再黎。 
羅勒印度餐廳
地址：北角七姊妹道7號昌輝閣地舖
Tel : 2568 3806