2022韓國自由行自駕遊第二日 清州 大田 全州 (金剛雪濃湯 蜂蜜糖餅 餃子店고추만두국집 聖心堂 誠津麵家)

 
第二日由清州去大田市再落全羅北道既全州韓屋村留宿。
一早起身入街市，要先到市中心附近泊車，清州其實都係城市，市中心一樣車多人多。
今朝要搵既係已有55年歷史既金剛雪濃湯。
餐廳隱身韓國五大傳統市場之一既清州六街綜合市場（청주육거리종합시장）內。
可能已過番工時間，唔使等就有位。
呢間都係首爾鄉巴佬第六集既到訪餐廳之一。餐牌都係簡單，叫湯就冇錯。
前菜先上。呢間既泡菜都好岩胃口，爽脆又夠甜。
一朝早個人重凍冰冰，飲啖出曬煙既暖湯真心正。
白雪雪既湯帶濃厚肉香。
牛肉湯渣都唔少，又有唔同部位。
雖然全都已煲到出曬味，但仍有鮮肉味道。
飲完雪濃湯後，當然順手行下街市睇下野買下生果。本來想買士多啤梨試下但決定睇定先。
除左生果都有好多冰鮮海鮮。

經過清州中央公園去下一站。
公園內都有貓貓出沒。

下站去左首爾鄉巴佬第五集另一食點，清州人龍小食炸蜂蜜糖餅店試下。
蜂蜜糖餅只做外賣，不過糖餅店其實佔據左另一間食店既一角，所以係個間食店坐低食野亦可直接落單叫糖餅。排住隊睇住一個個粉糰變成糖餅都好吸引。
熱辣辣炸起既蜂蜜糖餅非常燙手。
咬落唔係脆個隻，但食落唔油膩甜度都岩岩好。

食完糖餅就動身去搵餃子店 고추만두국집 。
餐牌都係走簡單路線。
餃子口感同食開既有分別之外，入面食到加入蟹肉蟹汁同辣椒，而且唔好睇個湯白色咁，其實會愈食愈辣。
個冷麵有驚喜。
麵質滑身有咬勁，個湯汁酸度剛好，加上配料愈食愈開胃。

食飽飽就開車南下落去大田，到訪韓國五大麵包店之一既聖心堂(성심당)。
聖心堂總店係市中心銀杏洞既步行街內。
聖心堂於2011年已收獲米芝蓮推介，2014年羅馬教主到訪韓國都試左聖心堂既出品，而2015年既其中一集Running Man都有黎過玩遊戲。
1956年創立既聖心堂真係人氣店，離遠已見到條人龍，可能岩岩撞正高峰時間，人龍長到嚇親，不過最後都排左一陣就入到。麵包款式都好多鹹甜齊備。
即製三文治熱狗都有。
炸包類及韭菜包都係名物。
小試牛刀只買左炸包、韭菜包同蘋果酥餅，包身的確口感鬆軟，炸包又更香口又唔會太油，自己更鍾意菜韭包既口味。
不過最好食都係個成朵花咁靚既酥餅。
離開大田再南下先到今晚留宿既全州韓屋村，放低行李就出發食晚餐。
呢間韓屋村都有幾舒服既common area。
放底行李就去首爾鄉巴佬第十集既全州誠津麵家。
我地人丁單薄所以只試下炒碼麵同白切肉。
餐牌都唔算太多選擇。
炒碼麵十分足料好多海鮮，而湯汁係精華所在，湯汁帶濃郁海鮮味。
吸左湯汁既麵條令人食唔停。
白切肉睇落有點肥，但唔肥就唔似白切肉啦。
店家都跟上好多唔同醃菜配菜，夾埋一齊食就冇咁油膩。
食飽就行番韓屋村，去附近市集行下落下格。
韓屋村附近既路邊都有唔少店舖。
路上都有貓貓。
周圍都有燈飾襯托，其實幾好氣氛。
最後既宵夜就決定學下韓仔，去路邊檔食炸雞。
不過隻雞好一般，比較乾又冇雞味。食埋炸雞真係要回去休息。
回程經過豐沛之館 (풍패지관)，豐沛二字跟朝鮮開國君主李成桂將故鄉全州叫做豐沛之鄉有關。
番到韓屋睇下今日係聖心堂個蘋果批，放係車度行左兩三個鍾都冇散開，食落重係香脆架。
蘋果批入口輕薄咬落鬆脆，一個人都可以輕鬆KO整個。另外重有個手信帶番香港先食。
另外整定尋日係樂天超市買既杯麵，今晚等睇世界盃。

金剛雪濃湯 금강설렁탕
충북 청주시 상당구 상당로5번길 35
043-256-2311
蜂蜜糖餅
충북 청주시 상당구 상당로55번길 40-1 
043-221-2208

聖心堂성심당
15 Daejong-ro 480beon-gil, Jung-gu, Daejeon
82-1588-8069

餃子店 고추만두국집
충청북도 청주시 상당구 서문동 80-5

誠津麵家
전북 전주시 덕진구 아중중앙로 44
507-1343-1740

韓國自由行自駕遊第一日